Premier League inkhelah London derby kan hmu a, West London club Chelsea chuan North London club Tottenham chu Tottenham Hostspur Stadium-ah tlawhin, mikhual lam Chelsea hian si hnih faiin hnehna an changa, point 3 an hlawhchhuak.
Chelsea tan hian Willian chuan goal hnih a khunga, goal-te hi first half-a lut ve ve niin, Wilian-a goal hnihna hi penalty spot atanga khung a ni. 62min-ah Tottenham player Heung-min Son chu hnawhchhuah niin, darkar chanve vel mual neitu lam hian player 10-a an khelh a ngaih phah.
Khelh 18-ah Chelsea hian point 32 hlawhchhuak tawhin palinaah an awm chhunzawm zela, Tottenham hian khelh 18-ah point 26 hlawhchhuak tawhin 7-naah an awm mek ve thung a ni.
Tottenham 0-2 Chelsea
(Willian 12’, 45+4’pen)
Player Ratings
Tottenham: Gazzaniga 5, Aurier 5, Alderweireld 6, Sanchez 6, Vertonghen 5, Dier 5, Sissoko 6, Lucas Moura 6, Alli 6, Son 5, Kane 5. Subs: Eriksen 5, Ndombele 5, Rose 5.
Chelsea: Kepa 7, Azpilicueta 7, Zouma 8, Rudiger 8, Tomori 8, Alonso 7, Kante 7, Kovacic 7, Mount 7, Willian 9, Abraham 7. Subs: Jorginho 7, Batshuayi 6, James 6.
Match Report
Inkhel an tana minute sawm chuang hret khelh a nihin Chelsea hian hma an hruai nghal; Chelsea hian corner an hmu a, Willian chuan short corner a la thunga, veilam atanga rawn cut lutin Braziian winger hian mawi em em goal-ah a pet luta, Chelsea hma a hruaipui.
Inkhel a hmuhnawm thawkhata Chelsea game a fuh hle. Tottenham manager hi Chelsea manager vawi hnih lai lo ni tawh Jose Mourinho a ni a, Mourinho hian tuna Chelsea manager Frank Lampard chu hun eng emaw chen lo enkawl tawhin, trophy hrawl tak tak an chawi dun nual tawh.
Darkar chanve vel khelh a nihin Tottenham-in chance an nei a, Sissoko-a pass atangin Harry Kane chuan chance nei mahse hlauhawmah a chhuah lova, hemi hnu lawk hian Son chuan chance tha tak nei ve leh nghal mahse ani pawh hian goal-ah a chantir thei lo.
Chelsea hian first half tawp hma lawkin goal dang an khung belha, mahse penalty a ni thung; Spurs keeper Gazzaniga chuan Chelsea defender Marcos Alonso chu ball clear a tumna lamah a bawhthluk avangin Chelsea hian penalty an hlawhchhuaka, penalty spot atangin Willian chuan Chelsea goal hnihna a khung.
Darkar khat vel khelh a nihin Son chu hnawhchhuah a ni a, ani hian chhuata a tluk laiin Chelsea defender Antonio Rudiger chu a awmah a tlawh luih avangin South Korean player Son hi hnawhchhuah a ni. Second half tan tir lam deuhah Chelsea hian goal an khung emaw an ti zeta, Alonso shot chu Spurs keeper Gazzaniga chuan lo save mahse Abraham chuan goal-ah a lo thun zuia, mahse Abrahma hi a offside avangin goal-a pawm a ni lo.