Inrinni tlai dar 5:00 hian Anfield-ah Manchester United chuan Liverpool an tlawh dawn, Liverpool vs Manchester United hi engtik lai pawhin fixture en chakawm a ni ziah.

An game a hmuhnawm emaw hmuhnawm loh emaw, club inhal an ni a, Munich-a chhiatna leh Hillsborough chhiatna tawk tawh ve ve an ni, heng an chhiat tawh pawh indeu nana hmang duh hial khawpa inhua an ni. Chuvang chuan game hmuhnawm tak an khel lo a nih pawhin game rorum tak an khelh leh ngei a rinawm.

Team News :

Liverpool chuan Sadio Mane tel lovin United an hmachhawn dawn, ani hi ram tan a fehchhuahnaah hamstring a tihliam palh hlauh a, kar 6 emaw vel a chawlh a ngai dawn. Philippe Coutinho leh Roberto Firmino te chuan World Cup qualifier-ah ram tan hah takin khel mahse United hmachhawn turin Klopp chuan a thlan ngei a rinawm.

United tan midfielder Fellaini chu khup hliam vangin a inlan thei dawn lova, captain Carrick erawh a khelh theih a rinawm, hetih lai hian a la chiang lo. Pogba leh Phil Jones erawh an inlan thei dawn lo a ni.

Head-to-head

Kum 2014-a si thum faia Liverpool-in United an hneh hnu khan League-ah Liverpool hian United an la hneh leh lo. United hian Anfield an tlawh hnuhnung match 5-ah vawi thum hnehna an chang a, vawi khat draw an neih bakah vawi khat an tlawm. An game hnuhnung pahnihah clean sheets an nei ve ve.

Club pahnih dinhmun thlir letna :

Competition hrang hranga an game hnuhnung 14 Anfield-a an khelhah Liverpool hian vawi 8 hnehna an chang a, vawi 5 an draw, vawi khat an tlawm thung. Hetih lai hian tun hnaiah Liverpool an che tha lo hle a, league leh cup-a an game hnuhnung 7-ah vawi khat chiah hnehna an chang a, vawi 4 an khingpui an inhnehtawkpui bakah vawi khat an tlawm.

Premier League-ah Liverpool hian game 7 khel tawhin point 12 an nei mek a, table-ah 7-na an ni mek. Klopp leh Mourinho te hi competition hrang hrangah vawi 7 an lo inhmachhawn tawh a, Klopp hi vawi khat chiah a la tlawm, vawi 3 hnehna a chan bakah vawi 3 an inhnehtawk a ni. Liverpool playmaker Coutinho hian Premier League game hnuhnung 12-ah goal 9 khung tawhin assist vawi 3 a nei.

Tun Inrinni hian United hi an chak a nih chuan tun season Premier League-ah game 8 atangin point 22 an nei dawn tihna a ni a. Kum 2017 chhungin clean sheets vawi 17 lai an nei a, anmahni hnaih bertu aiin clean sheets vawi 3-in an chungnung zawk. League game hnuhnung 9-ah clean sheets vawi 8 lai an nei nghe nghe a ni.

Tun season Premier League-a game 7 atanga goal 7 khung thei Romelu Lukaku chuan goal a khung leh a nih chuan United tan season khatnaa League game 8 atanga goal 8 khung thei hmasa ber a ni dawn. Hetih lai hian Lukaku hian Liverpool lamah goal a khung tam lem lo, Liverpool a hmachhawn game hnuhnung 7-ah Lukaku hian goal khat chiah a khung thei. United defender hlui Gary Neville chuan Lukaku that leh that loh fiahna a ni dawn niin tun match hi a sawi. Rashford erawh tunlai a vul chho mek a, a game hnuhnung 10-ah goal 5 khungin assist vawi 5 a nei.

Eng game nge an rawn khelh ang?

Liverpool tlarhnung a phui hleithei lo, hei vang hian Klopp chuan hmatawng neitha United a hmachhawn dawn tih a chiang, uluk takin a team a rem ngei a rinawm, chutih laiin attacking football hmuhnawm tak a khelhtir leh tho rin a ni. Jose Mourinho chuan a tlar hnung a remphui leh viau a rinawm a, hetih lai hian hmatawng viak tha Liverpool hian an pal darh thei tlat mai.

Salah chuan World Cup 2018-ah a ram a qualify pui hlim hlawl, tunlai Premier League player zinga langsar ber a ni a, Coutinho nen danglamna siam thei an ni tlat mai. Liverpool hian 4-3-3 formation an hman a rinawm, Jose chuan 4-2-3-1 formation a hman a rinawm a, Lukaku chu hmatawngah a dah leh ngei a rinawm. Hetih lai hian midfield-ah Fellaini leh Pogba an awm dawn lo, hei erawh United tan chuan hlauhthawnawm tak a ni ngei dawn.

Tun dinhmuna team tha zawk nia lang chu Manchester United an ni a, an squad pawh a chhah tha hle, inhliam nei nual mahse team khawng tak an la ni chho mek tho. Liverpool erawh tunlai an buai deuh, wing atanga attack an dawl lova, through ball-ah an defender te an talbuai fo, hemi tak hi Jose chuan chhut darh nan hman a tum ngei a rinawm.

Liverpool game kan en chuan ball posession-ah an sang thin, a lai atanga sut tlang an tum, United pawh short pass game uar an ni a, ball pawh an vawrh nasa tho bawk, hetih lai hian Fellaini leh Pogba an awm dawn tak lovah chuan Jose chuan Mata emaw Herrera emaw a chhawr tangkai a rinawm.

Boss ten enge an sawi?

Manchester United boss Jose Mourinho chuan, "Tunlai chu team tha zawk kan ni tlat mai, hemi ka sawi chhan hi kan khingpui ka zah loh vang pawh a ni lo. Top 4 emaw top 5 emawa awm lo team hmachhawn hi a awlsam deuh maithei, an tan ngaihthlaknawm erawh a ni hauh lovang le.

"Hetih lai hian season hmasa khan team lian ni lovah points kan hloh nasa mah mah, chuvang chuan inkhelh kan tan hma hauh pawha chak tura indahna hi kan neih a ngai.

"Anfield boruak kan hria e, kan eizawnna a nih ang takin kan che tur a ni, eng match pawh hi a pawimawh a, match awlsam reng a awm lo. Hetih lai hian hetia ka sawi avang hian he match aia pawimawh lo hi a awm ka tihna a ni chuang lo a nia," tiin a sawi.

Reds boss Jurgen Klopp chuan, "Khawvel fooball-ah chuan he match hi a special hle a ni, kan ngaihlu em em a, result duhthusam hlawhchhuah pawh kan duh a ni," tiin Zirtawpni press conference-ah a sawi.