4-2 a AC Milan an hneh loh tumin Luis Diaz chu Liverpool team-ah a tel ve lo a, a tel ve loh chhan hi Arne Slot chuan transfer chungchang vang a nih thu a sawi chhuak.

Inrinni zan khan Hong Kong-ah Liverpool leh AC Milan te chuan pre-season friendly match an khel a, Milan chuan 4-2 in hnehna an chang. He match-ah hian Bayern Munich-in an ngaihven mek Luis Diaz chu a tel ve lo a ni.

Colombian attacker manah hian Bayern FC chuan €67.5million (£58.6m; $78.8m) an thehchhuak a, hei hi Liverpool lamin an lo hnar. Bundesliga club hian Diaz hi an ngaihven chhunzawm zel bawk.

"Lucho chungchangah chuan, a hma hun tur chungchang ngaihtuah a ni a, chuvang chuan team-ah a tel ve rih lo.

"Transfer titi leng vak a tam hle, chumi chungchang chu ka sawi thei lo. Training tha takin a nei a, chutih laiin a hma hun tur chungchangah erawh thutlukna kan siam a ngai a ni.

"Player dang te ka biak ang thoin Diaz hi ka titipui tawh a, ka lo sawi tawh ang khan, Lucho hi kan hnenah training tha takin a nei a, a tana tha tur ber kan ngaihtuah ang a, thutlukna kan siam dawn a ni, tun dinhmunah erawh engmah sawi lawk theih ka nei lo a ni," tiin Liverpool boss Arne Slot chuan Diaz-a chungchang a sawi.