Liverpool chuan Bournemouth atangin left wing back Milos Kerkez an la lut fel ta a, a manah Liverpool hian £40million ($54m) an thehchhuak.

Hungary International hian thawhtanni khan Liverpool a pan a, medical te a neih zawhin kum 5 daih Anfield-ah contract a ziak ta a ni.

Kum 21 mi Kerkez hi tun nipui bazara Liverpool player lak luh 4-na a ni a, Jeremie Frimpong  leh Florian Wirtz te chu Bayer Leverkusen atangin an la lut tawh a, goalkeeper Armin Pecsi pawh Puskas Akademia atangin an la lut tawh bawk.

Kerkez hian Liverpool squad a tichak sawt dawn niin a ngaih theih a, Bournemouth pawhin Kerkez thlaktu tur an la lut fel tawh a, tun thla tir lam khan Rennes atangin Adrien Truffert an lak bakah, Argentine Julio Solar chu Lanus atangin January thla khan an la lut tawh bawk.

Kerkez hian kum 2023 khan AZ atangin Bournemouth a zawm a, a man kha £15.5million ($20m) vel nia report a ni. English club tan game 67 a khel ve hman a, goal 6 khung tawhin, assist vawi 2 a nei tawh bawk.

Season liamta Premier League-ah khan match zawng zawng a khel a, Bournemouth chu table-ah 9-na a nihpui. Hungary tan game 23 a khel tawh a, kum 2022 khan senior team tan a khel tan a ni.