Liverpool defender hlui kum 34 laia upa ni tawh John Arne Riise chuan a vanglai hun a hman ralna Liverpool a la hmangaih zia tihlan nan social media ah "You'll Never Walk Alone" tattoo a pholang.
Liverpool chu a thinlungah a la len zia tarlan nan Riise hian kawh zet zeta goal khung nana a lo hman tawh thinna a ke veilama a chhut Liverpool au hla ber YNWA tattoo chu Instagram ah pholangin, ka tattoo thar neih ka pholan hi ka chhuang hle a, Liverpool club leh fans te chunga ka zahna lantirna a ni tiin a ziak bawk.
Ka hlim hle a, ka tattoo hi mawi in tih pawh ka ring, kum sarih zet Anfield a hun ka hmanna leh min lo support tawh thinna zawng zawng te khan ka thinlungah thu tam tak a la sawi reng a ni tiin a sawi.
2001 a Anfield a Man Utd an hmachhawn tum khan Riise hian freekick kawh zet hmangin goal a thuna, hnehna an chang zui bawk a nih kha. Khata tang khan khawvelin a lo hmelhriat lehzuala, a kawr pawt chho in a hmai hup nan a hmanga, a khup hmanga tawlh pahin a goal thun a lawm zui nghe nghe. A goal lawm dan pawh a hnu lehzela a lawm dan a ni chho ta a nih kha.
Cyprus club Apoel Nicosia tan season khat chiah a khelh hnuah a contract a ti tawpa, Riise hian tunah hian club a nei hrih lo a ni.
2001-2008 inkar khan The Reds tan Riise hian game 339 a khel hmana, FA Cup, League Cup leh Champions League te Liverpool tan a chawi hman a ni.
(adsbygoogle = window.adsbygoogle || []).push({});