Jacket lum leh lian tak tak an rawn ha chhuak a, puan lum sin bawkin an rawn chhuak duah duah mai. "Tu te nge in nih?" tiin kan zawt a, anni chuan, "Liverpool supporters kan ni," tiin min chhang. An khawsakna a san tawh em avangin a in hak lum an mamawh em a ni.

Pathianni zan khan Anfield-ah Liverpool chuan si hnih faiin champion lai Manchester City an hneh a, Gakpo leh Salah te chuan goal khungin, Liverpool chuan Premier League hma an hruai chhunzawm zel a, champion lai Man City hi point 11 laiin an tlansan ta a ni.

Khelh 13 atangin Liverpool chuan point 34 an hlawhchhuak a, pahnihna Arsenal nen an inkar chu 9 a ni a, champion lai Man City erawh 5-naah an tla thla ta. Table-a 9-na Manchester United leh Man City te inkar hi point 4 chiah a ni ta bawk.

Pep Guardiola chuan a pawlte chu Premier League-ah a zawnin vawi 4 a tlawmpui a, competition hrang hranga an game hnuhnung 7-ah vawi 6 an chak lo a, vawi 1 an khingpui an inhnehtawkpui.

Anfield-a inkhel hmuhnawm taka Liverpool chu a tir atangin an chungnung nghal. Minute 12-ah box dinglam sir atanga Mohamed Salah cross chu Cody Gakpo chuan far post atangin a pal goal.

First half chhungin Liverpool-in shots vawi 10 lai an nei a, Man City erawhin vawi 1 chiah shots an nei. First half-ah Liverpool hian goal khat aia tam khungna hun tha tak an nei.

Van Dijk chuan City goal ban a tauh per dawp a, hemi hnu hian free takin a tauh leh a, a tauh out chiah chiah bawk. Alexander Arnold pawhin box pawn atangin City goal ban a pet per bawk.

Second half minute 78-ah Mohamed Salah chuan penalty atangin Liverpool goal hnihna a khung. Ortega chuan box chhungah Luis Diaz a titlu a, referee chuan penalty hamin, Salah chuan tihsual nei miah lohin a chhuih goal.

Mo Salah chuan tun season-ah game 20 atangin goals+assists 24 lai  a nei ta hem mai. Manchester khaw club hi a ngam hrim hrim, City lakah goal 12 a khung tawh a, United lakah goal 15 a khung tawh bawk.

Salah hian goal dang khungna hun tha an nei bawk a, free lutukin ball a khalh a, goalkeeper chiah a hmachhawn tawh tihin a pet over. Tin, box pawn atangin kawt zetin a pet goal lo chiah chiah bawk.

Man City lamin chance an nei tam lo, an chance tha ber chu Van dijk tihsual kha a ni awm e. Kevin de Bruyne chuan ball a chhuhsak a, keeper chiah a hmachhawn tawh, De Bruyne hian a shot a, Kelleher chuan a lo dan sak a ni.

Inkhelh pumpui thlirin Liverpool-in chak an phu a, shots vawi 18 lai an nei a, City erawhin shots vawi 8 an nei. Liverpool hian shots on target vawi 7 an neih laiin City chuan vawi 2 chiah an nei a ni.