Liverpool chuan an defender Kostas Tsimikas chu Thawhtanni khan contract thar an ziahpui thu an puang a, Tsimikas-a contract thar hian kum 2027 June thla thleng a daih.

Contract thar a ziah hma hian kum 27 mi hian Anfield-ah kum 2025 June thla thleng daih contract a la nei a, a contract neih lai chu Liverpool hian kum hnihin an pawhsei sak a ni.

Tsimikas chuan, “Contract thar ka ziak thei hi ka lawm hle a, ka inpekna leh ka thawhrimna rah ka hmu niin ka hria. A bak lo la awm tur atan hei hian min ti phur em em a, interview tam taka ka lo sawi tawh angin he team hian hlawhtling zel turin theihna kan nei a, chumi a tel ve chu ka duh a ni,” tiin contract thar a ziah chungchang a sawi.

Liverpool hian Greek left-back hi kum 2020 khan Olympiacos atangin an lei a, a manah pound maktaduai 12 bawr vel sengin, Liverpool a zawm hnuah Tsimikas hian FA Cup leh League Cup te vawi khat ve ve a chawi tawh.

Liverpool hian an full-back dang Trent Alexander-Arnold pawh contract thar ziahpui an tum mek tih chanchinbu mite chuan an tarlang a, kum 24 mi hian Christmas hmain contract thar a ziah a rinawm thu tarlan a ni bawk a ni.