Liverpool midfielder hlui Charlie Adam chuan Liverpool chu Premier League-a champion turin player pahnih emaw pakhat bak an mamawh tawh loh thu a sawi.

Liverpool hian season liamta khan Champions League final an thlenga, Real Madrid an hneh lova, Premier League lamah palina an ni bawk. Manager Jurgen Klopp a hnuaiah ngai an awh chho leh meka, squad pawh an thuam tha nasa hle. Reds hian tun nipui bazar-ah player thar lakluh nan pound maktaduai 170 dawn an seng tawh nghe nghe.

Season liamta chawhma lam khan Liverpool hi an defence a phui tawk lo hlea, thlasik bazar-ah khawvela defender manto ber ni turin Netherlands captain Virgil Van Dijk chu Southampton atangin pound maktaduai 75-in an laluta, mahse an midfielder hlui Charlie Adam chuan Manchester City el pha tur chuan defender pakhat an la mamawh thu a sawi.

Adam chuan Liverpool chu an bazar dan chungchangah a fak a, Anfield-ah hian Leipzig atangin midfielder Naby Keita chu pound maktaduai 50 bawr vela a luh tawh bakah, Brazilian midfielder Fanbinho pawh AS Monaco atangin a lut tawh a, hmatawng lam pui turin Stoke City atangin Xherdan Shaqiri a lut tawh bawk. Thla hmasa lawk khan Liverpool hian khawvela goalkeeper manto ber ni turin Brazilian goalkeeper Alisson Becker chu AS Roma atangin pound maktaduai 67-in an lalut bawk a ni.

Charlie Adam chuan Liverpool chuan Premier League title an chuh ve theih tep tawh thu sawiin, “Liverpool hian Premier League title la turin player pahnih emaw pakhat vel bak an mamawh tawh lo. Mohamed Salah thachhangdawl turin Shaqiri an lalut leh tawh bawka, Daniel Sturridge a dam chho bawk nen an squad a chhah hle,” a ti.

Adam chuan sawi zelin, “Season liamta khan goalkeeper lamah an buai a, Alisson an lalut nghala, Alisson hi point riat hu vel a ni nghal a ni,” a ti bawk.