Liverpool chuan nipui transfer window inhawn hunah Werder Bremen midfielder Milot Rashica chu lak luh an duh.

Kosovo midfielder kum 23-a upa Milot Rashica hi tun season chhungin Bundesliga lamah a che tha hle a, game 18 khelhah goal 7 ngawt chu a thun tling tawh a ni.

Jurgen Klopp chuan Bundesliga club midfielder bakah hian RB Leipzig forward Timo Werner chu a hmu tai viau bawk a. Milot Rashica hi Liverpool scout te pawhin an thlithlai ngun hle niin Germany rama chanchinbu lar Bild chuan an tarlang.

Milot Rashica hian Werder Bremen lama a contract neih laiah buyout clause €38 million (£31.5 million) a nei niin an sawi a, heti a nih chuan Premier League club Liverpool hian an la lut duh a nih chuan nipui hunah £31.5 million chuan an neih theih hmel hle.

January 2018 ah khan Milot Rashica hian Dutch club Vitesse Arnhem chhuahsanin Werder Bremen hi a zawm a, 2022 thleng contract a ziak a ni.

2016 ah khan Albania atangin Kosovo tana khel tur hian a insuan chhuak a, thla tharah hian Euro 2020 play-off chu Kosovo tan hian a khel dawn a. 2019-20 season bikah Rashica hian game 21 a khel tawh a, hengah hian goal 10 a thun tawh bakah, mi goal thun tur vawi 4 chu a siamsak tawh a, yellow card hi vawi 2 a hmu tawh a ni.

RB Leipzig CEO Oliver Mintzlaff chuan Liverpool enthlak mek Timo Werner chu an club-ah chuan a la hlim thu a sawi chhuak a, hmun dang pan chu a rilruah a awm rih lo niin a sawi a ni.

Timo Werner chuan a contract neih laiah release clause £51 million a nei a, hei hi kumin April thlaah hian a tawp dawn nghe nghe a. Heti a nih chuan European champion hian rang takin hma an la ve thut thei a ni.