Nakkum January thlaah hian Liverpool chuan Borussia Dortmund star Jude Bellingham chu sum tam tham tak nen an dawr dawn tih Footballer Insider chuan a tarlang.

Liverpool hian kum 19 mi England midfielder hi an midfield thawm chak nan an player duh ber a nih thu an sawi a, a rang thei ang bera lak luh ngei tumin an inremna siampui an tum ang.

Borussia Dortmund midfielder hi lei tum an tam dawn a, chung zingah chuan Liverpool elpui Manchester City leh Chelsea bakah Real Madrid hming pawh a ri tel.

 Jude Bellingham-a pa Mark Bellingham hi a fapa hma hunah hian thuneihna a nei sang em em a, mi tam tak chuan a agent te ai mahin thuneihna a neih san zawk an ring.

Mark chuan Liverpool hi a fapa hma hun atana club pawimawh tak an nih a ring a, amaherawhchu, season leha Champions League a khelh theih ngeina tur a duhpui tel thu a sawi tel bawk.  

Borussia Dortmund lam hian Bellingham hi nakkum January-ah chuan an chhuahtir ngei a rinawm tawh a, mahse, nipui transfer hun nghah thlen law law erawh an duhthusam a ni ngei ang. Dortmund lam hian Bellingham hi contract thar ziahpui tumin an dawr tawh a, mah se an hlawhchham, tuna a contract neih mek hi 2025 nipui-ah a zo ang.

Club tam tak duh rawn kum 19 leka upa Jude Bellingham-a man hi a lo berah pound maktaduai 100 tal a ni dawn a. Ball keng thei midfielder a nih bakah a hun taka player insiksawi thei, midfield khawi laiah pawh a hman theih vekna leh defender te hma chiah (anchorman) ang pawha a ṭhat em em na hi amah duhtute mit titling bertu a ni ngei ang.

Season hmasa (2021-22) khan a che ṭha em em a, Dortmund tan game 44 inlanin, goal 6 leh assist vawi 14 ngawt a nei thei. Chu a chet ṭhatna chu tun season-ah pawh chhunzawm lehin, club tan vawi 18 inlanah, goal 8 leh assist vawi 2 a nei tawh a, Champions League lamah phei chuan vawi 5 inlan tawhin, goal 4 a thun leh der tawh.