Liverpool supporter te pawh khan, Newcastle United-in Benjamin Sesko la thei se an duh ve khawp ang. Kan hriat angin, Newcastle United hian Alexander Isak an chelh thei dawn lo nia an inhriat avangin RB Leipzig atangin Benjamin Sesko lei an tum a, sum pawh an thehchhuak huai khawp.

Hetih lai hian vawiin lam chanchintharah chuan, Sesko-a'n Manchester United pan a thlang ta si a, heti a nih chuan Newcastle United hian Isak hi an chelh lui tlat dawn em?

Liverpool khan £110m laiin Isak lei tumin Newcastle hnenah bid an thehlut, kha kha Magpies lamin an lo hnawl. Newcastle United hian Isak hi hralh an phal lo a, an hralh dawn a nih chuan £150m aia hniama hralh an tum loh thu an lo sawi tawh a nih kha.

Sesko-a'n United pan a thlan tak siah chuan, Liverpool pawh hian Isak hi an la thei kher ang em? Hetih lai hian Isak chu amahin training a nei mek reng a, chhuah a la tum ruh hle. Player-in chhuah a duh miau chuan, club tan chelh reng theih a ni bik lo a, Newcastle United pawhin striker dang an dap chhunzawm niin English media te chuan an tarlang.

talkSPORT-in a tarlan dan chuan Newcastle United hian Aston Villa striker Ollie Watkins lam an hawi mek. Villa hian Watkins hi an zawrh lai a nih loh thu an lo puang tawh a, an hralh dawn a nih erawh chuan £60m aia tlawma hralh an tum lo.

Newcastle United hian Isak chu chelh an duh ber a, ani hi Premier League-a tawnhriat nei tawh a ni bawk nen. Season liamta Premier League-ah khan game 34 atangin goal 23 a khung bakah assist vawi 6 a nei a, competition hrang hrangah goal 27 khungin assist vawi 6 a nei.

Premier League tan a ni tep tawh a, club te chu an hmanhmawh tawh hlawm a, tunkar chhung hian transfer news lian tak tak kan hre chho zut dawn niin a lang.