Liverpool chuan official takin Newcastle United hnenah an striker Alexander Isak lei an dil a, he an indawrna hmasa ber hi a tlawlh a, Magpies lam hian Liverpool hi an lo hnar a ni.

Liverpool hian Isak-a manah hian engzat nge an thehchhuah tih erawh tarlan a ni lo a, thla hmasa khan a thuphungin Reds hian £120million thehchhuah an inhuam tih tarlan a ni a, hetiang zat vel hian Liverpool hian Newcastle United an dawr a nih hmel. Liverpool hi an bei a dawn mai a rinawm loh a, an dawr nawn chho ngei dawn nia report a ni.

Isak hian Newcastle United chhuahsan a duh a, pre-season tour-ah pawh a tel ve duh lo. Amahin training a nei a, a club hlui Real Sociedad training ground-ah hun a hmang mek a ni.

Newcastle United hian Isak hi contract thar ziahpui an tum ve mek, hetah hian release clause pawh ziah tel an tum niin The Athletic chuan a tarlang. Hetih lai hian kum 25 mi hian Newcastle United chhuahsan a tum ruh hle a, contract thar chu a ziah hmel loh nia ngaih a ni.

Sweden international hian kum thum chhung Real Sociedad-ah hun a hman hnu kum 2022 khan Newcastle United a pan a, an inleina kha £60million (€69.4m; $79.3m) vel nia report a ni.

St James’ Park-ah Isak hian kum 3 daih contract a la nei, hetih lai hian a chhuak ngei dawn nia a lan mek avangin Newcastle United pawhin striker an zawng mek a, RB Leipzig striker Benjamin Sesko chu uluk takin an thlithlai mek a ni.

Isak hi ngelnghet takin a khel chho mek a, tun hnai Europe-ah chuan striker hot ber pakhat a ni. Season liamta khan competition hrang hrangah goal 27 a khung a, Carabao Cup final-ah khan goal pawimawh khungin, 2-1 in Liverpool an hneh a, kum 70 hnuah a vawi khat nan major domestic trophy an chawi leh a ni.