Liverpool chuan Dutch attacking righ-back Jeremie Frimpong chu Bayer Leverkusen atangin an lak luh thu an puang.

Frimpong hian Liverpool-ah medical a neih hnuin, kum 5 daih contract a ziak a, Premier League Champions hian a manah €35million (£29.6m; $39.3m) an thehchhuak a, hei hi kum 3 chhungin an tlak dawn a ni.

Kum 24 mi Dutch full-back hian 2023-24 Bundesliga title an lak theih nan khan tha a thawh hlawk hle a, goal 14 khungin, assist vawi 12 a nei a, Xabi Alonso khan khami season-ah khan game 47 a khelhtir a ni.

Tun season liamta pawh khan a khel chhe lo hle a, competition hrang hrangah game 48 khelin, goal 5 a khung bakah, assist vawi 12 a nei. Hetih lai hian Bundesliga-ah an title an humhim zo lo a, Champions League-ah pawh Round of 16 an pel ta lo a ni.

October 2023 khan Frimpong hian Leverkusen-ah contract thar a ziak a, a contract khan kum 2028 thleng a daih. Trent Alexander-Arnold chuan Real Madrid a pan avangin Liverpool chuan a thlakna tur an zawng nghal char char a, an mi duh tak an la lut thei ta a ni.