Liverpool chuan Jeremie Frimpong la turin theihtawp an chhuah zel a, Bayer Leverkusen nen indawrna an nei chho ta tak tak a, Frimpong-a agent te nen pawh inremna an nei tawh nia report a ni.

Frimpong pawh hian Liverpool zawm a duh niin The Athletic chuan a tarlang a, heti a nih chuan mimal thilah chuan Liverpool tan buaina tur a awm tawh lo.

Hetih lai hian kum 24 mi Leverkusen righ-back hian release clause €35million (£29.6m;$39.3m) vel a nei a, hemi chungchang hi Leverkusen nen indawrna an neih mek chhan chu a ni.

Leverkusen pawh hian an defender hi an chelh theih an inring lo a, hei vang hian tun inrinnia Bundesliga season zawh hma ngei hian inremna neihpui an duh nia tarlan a ni bawk.

Trent Alexander-Arnold chuan Liverpool chhuahsan a tum thu a sawi chiang a, Real Madrid a pan dawn nia report a ni. Hei vang hian Liverpool chuan TAA-a hmunruak hnawhkhattu tur an dap mek a ni.

Season hmasaa Budesliga title an lak tum khan Frimpong a khel tha hle. Competition hrang hrangah game 47 a khel a, goal 14 khungin, assists vawi 12 a nei bawk.

Kum 2023 October thla khan contract thar a ziak a, tuna a contract hi kum 2028 thleng daih a ni.

Kum 2021 khan Frimpong hian Celtic atangin Leverkusen hi a zawm a, viak tha tak, tlan chak leh attacking atana player tangkai tak a nih avangin Bundesliga club pawh hian an ngaina nghal.

Tun season-ah pawh Dutchman hi a khel chhe vak lo, Xabi Alonso-a hnuaiah game 48 a khel a, goal 5 khungin assist vawi 12 a nei.

Netherlands tan game 12 a khel tawh a, Manchester City academy chhuak hi England lamah a kir leh ngei dawn niin a lang ta a ni.