English champions Liverpool chuan Bayer Leverkusen attacking midfielder Florian Wirtz chu lak tumin an dawr tan ta.

Kum 22 mi hi tun lai player naupang zinga ngaihven hlawh ber pakhat a ni a, Bayern Munich leh Manchester City te pawhin an ngaihven a, Liverpool chuan Florian Wirtz-a agent an dawr mek niin The Athletic chuan a tarlang.

Season hmasaa Bayer Leverkusen-in Bundesliga title an lak theih nan khan, Florian Wirtz hian tha a thawh hlawk hle a, Xabi Alonso-a team tan khan goal 11 khungin, assist vawi 12 a nei a nih kha.

Tun season-ah pawh Wirtz hi a khel tha chhunzawm zel a, Bundesliga goal 10 khung tawhin, assist vawi 12 a nei bawk.

Florian Wirtz hian kum 2027 thleng Leverkusen-ah contract a la nei a, thla hmasa lawk khan Leverkusen CEO Fernando Carro chuan an attacking midfielder chu an zinga a tel chhunzawm zel a rin thu a sawi a nih kha.

Wirtz hian a ram Germany tan game 29 a khel ve tawh a, Euro 2024-ah khan Julian Nagelsmann-a team-ah a tel ve a nih kha.