Barcelona chuan Anfield atanga Luis Diaz lak chhuah tumin hma an la a, Liverpool chuan Catalan club hi an lo hnar a, an winger tha hi hralh an phal loh thu an lo hrilh.

Kum 28 mi Colombia international hian kum 2022 khan Porto atangin Liverpool a zawm a, Anfield-ah hian kum 2027 thleng contract a la nei a, contract thar tunah hian an ngaihtuah mek nia report a ni.

Nilaini khan Barcelona chuan Luis Diaz an duh thu Liverpool an hrilh a, mahse Reds hian an winger hi hralh an phal loh thu Catalan club sporting director Deco an hrilh chiang a, Diaz hi season tharah pawh an player pawimawh a la nih zel dawn thu an sawi tel bawk niin The Athletic chuan a tarlang.

Nikum nipui bazarah khan Manchster City pawhin Luis Diaz hi an lo beisei ve tawh a, tunah hian Saudi Arabia lam pawhin an ngaihven mek bawk. Hetih lai hian Diaz chuan Anfield-a hun hman zel a la duh a, a hlim em em thu a sawi ve mek bawk.

Merseyside club-in Premier League no mawi vawi 20 an chawi theih nan Diaz hian tha a thawh hlawk hle a, hei vang hian Liverpool sporting director Richard Hughes leh Fenway Sports Group’s chief executive of football Michael Edwards te chuan contract thar zawrh an tum, hetih lai hian contract thar chungchangah erawh thu thar a la awm rih lo thung.