Inrinni tlai khan Premier League inkhelah Liverpool chuan London club Crystal Palace an luhkhung a, 2-1 in khual mualah Liverpool hian hnehna an chang hram.

Selhurst Park-ah hian Liverpool tan Mohamed Salah leh Harvey Elliot te chuan goal khat ve ve an khung a, mual neitu lam Palace goal neihchhun hi penalty spot atanga Jean-Philippe Mateta thun a ni.

Khelh 16 atangin Liverpool hian point 37 an hlawhchhuak tawh a, he chanchin ziah lai hian pakhatnaah chho in, mahse Arsenal result a zirin pahnihnaah an tla thla leh thei. Palace hian khelh 16-ah point 16 an nei a, 15-a dinhmun an luah.

Liverpool leh Palace inkhelah hian first half-ah goal lut a awm lova, goal hmasa ber hi darkar khat an khelh tlin hma deuh hreta lut a ni. Second half-a minute sawm vel an khelhin Liverpool full-back Trent Alexander-Arnold chuan penalty a chawi a, hei hi Mateta chuan goal-ah chan tirin Palace in hma an hruai.

75mins an khelhin Palace forward Jordan Ayew chu Elliot-a lakah a foul a, Ayew hian a vawi hnih nan yellow card hmu in hnawhchhuah a ni. Player 10-a Palace an khelh hnu lawkah Liverpool in an si phurh an sut nghal a, Salah chuan box chhung atangin goal-ah ball a pet lut a, 1-1 niin, Salah hian Liverpool tana a goal 200-na a thun a, Liverpool chanchina goal 200 khung tling thei pangana a ni.

Liverpool hian 90mins vel chiahah an chakna goal an khung a, Elliot chuan dinglam atangin Palace box lamah ball a cut lut a, box pawn vel chiah atangin a ke veilamin goal-ah ball a chhuih lut a, 2-1 in Liverpool hi an chak a, point 3 pawimawh tak an hlawhchhuak a ni.