Sunday zan khan Premier League inkhelah Liverpool chuan Bournemouth an tlawh a, khual mualah Liverpool hian si li faiin hnehna pawimawh tak an chang. Vitality Stadium-ah hian Liverpool tan Darwin Nunez leh Diogo Jota te chuan goal hnih ve ve an khung a, Merseyside club hian point 3 hlu tak an hlawhchhuak.

Liverpool hi Premier League hmahruaitu an ni chhunzawm zel a, khelh 21 atangin point 48 hlawhchhuak tawhin, pahnihnaa awm Manchester City nen point 5 in an inthlau a, mahse Liverpool hi khelh khatin an khel tam zawk. Bournemouth hian khelh 20-ah point 25 neiin, 12-na dinhmun an luah ve mek a ni.

Liverpool leh Bournemouth inkhelah hian goal li lai lut mah se, first half-ah goal lut a awm lova, second half tir lamah goal hmasa ber a lut. Second half an tan atanga minute linaah Liverpool in hma an hruai a, Jota ball pek chu Nunez chuan box chhung atangin goal-ah a chan tir a, Liverpool in an goal hmasa ber an khung.

70mins-ah Liverpool in goal an khung belh a, Cody Gakpo chuan box chhunga tlan lut Jota ball a pe; Jota hian goal ah ball pet lut chhunzawmin, si hnih faiin Liverpool in hma an hruai. Minute 9 hnuah Jota hian goal a khung leh a, Liverpool goal thumna niin, si thum faiin Liverpool in hma an hruai.

Liverpool hian 3-0 in hnehna an chang dawn emaw tih hnuah goal dang an khung belh leh a, injury time-ah Joe Gomez-a ball cross tha tak chu Nunez chuan far post atangin goal-ah a khung a, 4-0 in inkhel a tawp ta a ni.