Ningani zan zanlai khan Carabao Cup 4th Round-ah Manchester City chuan 3-2 in Liverpool an hneh a, quarter final an inpet kai.

He match hmuhnawm takah hian goal 5 lai a lut, City tan Haaland, Mahrez leh Ake ten goal an khung a, Liverpool tan Carvalho leh Salah ten goal an khung bawk.

World Cup avangin Domestic football chawlh a ni a, England lamah chuan World Cup khelh zawh atanga kar khat pawh tling loah League Cup khelh chhunzawm nghal a ni.

Sawi fo tawh angin World Cup-ah Football hmuhnawm tak tam lo thin mah se a boruak a ropui a, club football lamah erawh football hmuhnawm tak tak kan hmu thin, hetia World Cup zawh hnu lawka Football hmuhnawm tak kan en chhunzawm leh nghal zat thei hi a hlu hle.

City leh Liverpool match a hmuhnawm hle, goal mouth action tam tak a awm, hun tawp lamah buai hat pawh a thleng nghe nghe.

Inkhelh tan atanga reiloteah Haaland chuan free ball tha tak hmuin a pet over, hemi hnu lawk minute 10-ah mual veilam sir atanga De Bruyne cross chu Haaland chuan box chhung pen 8 vel atangin a volley goal.

Minute 20-ah Liverpool chuan Carvalho hmangin an siphurh an rul ve nghal. Box dinglam atanga Milner-a ball pek tha tak chu Carvalho chuan awlsam takin pen 10 vel atangin a chhuih goal.

Half time a ni a, team hnihte 1-1 in an inhnehtawk. Second half tantirah City chuan Mahrez hmangin hma an hruai leh. Rodri ball pek tha zet chu Mahrez chuan box dinglam sirah changin a lai lamah a la lut, mawi lutukin a chhuih goal, a first touch a that avangin goal tha tak a khung theih phah a ni.

Liverpool lamin minute 48-ah counter attack hmangin an siphurh an rul ve leh. Mual veilam sirah Darwin Nunez chuan free ball chak taka umin a laia tlan lut Salah tan a pe a, City defender te leh goalkeeper te an che hman lo chiang hle.

Minute 58-ah City chuan an goal thumna leh an chakna goal Ake hmangin an khung. Short corner an nei a, mual veilam sir atanga de Bruyne cross chu Nathan Ake chuan a tauh goal, hun tawp lamah City lamin goal dang a khung teuh hle, De Bruyne shot chu Fabinho chuan goal line atangin a lo dang a, Foden-a shot pawh Kelleher chuan a lo dan sak bawk.

He match-ah hian City lamin chance tam tak an nei, Kelleher a che tha a, goal tur tam tak a lo dang. Darwin Nunez erawh Salah-a goal tur a siam sak bak a che tha em em lo, hattrick siam theihna chance tha tak nei mah se a hlah vek kan ti thei awm e.

World Cup khel player te pawh an inlan nghal nual a, Liverpool tlarhnungah Van Dijk a khel lo hlauh a, ani awm loh an tuar te pawh kan ti thei bawk ang.

Quarter final khel tur kan hre kim ta a, quarter final fixtures hetiang hian :

Manchester United vs Charton Athletic
Southampton vs Manchester City
Nottingham Forest vs Wolves
Newcastle United vs Leicester City