Thawhṭanni zan khan Premier League Champions Liverpool chu St. James' Park-ah an leng lut a, inkhel hmuhnawm takah goal 5 lai a lut.

Liverpool tan Gravenberch leh Ekitike ten goal an khung a, Newcastle United tan Guimaraes leh Osula ten goal an khung. Hun pangngai a z0 tawh, team hnih te 2-2 in an inhnehtawk dawn nia a lan laiin, kum 16 mi Ngumoha chuan 90+10 minites-ah goal a khung a, 3-2 in Liverpool a chakpui.

2025-26 Premier League season game hnih an khelh aṭangin Liverpool hian point 6 an hlawhchhuak a, Arsenal, Tottenham leh Liverpool te chu point awm thei zawng zawng hlawhchhuak thei an la ni a, Reds hi table-ah pathumna an ni mek.

St. James' Park-a inkhel hi a hmuhnawm hle. Mual neitu lamin bul an ṭan ṭha a, minute 30 chhungin Gordon chuan chance hlauhawm tak tak vawi 3 a nei hman. Hetih lai hian darkar chanve an khelh tlin hnuah Gravenberch chuan box pawn aṭangin mawi lutukin a chhuih goal.

Gravenberch hian lei hrulah kawh mar pawtin a chhuit a, Guimaraes chuan tlemtein a lo tawk kawi deuh bawk nen, bottom corner-ah mar pawt khawpin a leu lut. Goal mawi leh ropui tak a ni chiang. Newcastle United an ṭang em em a, Liverpool defender te pawh pressure an pe nasa. Mahse an chesual palh.

First half tawp dawn tak takah Gordon chuan red card a chawi tlat mai. Van dijk-a ball pet tur chu Gordon chuan a tlawh a, chawnpuar rang ruai khawpin a tlawh niin a lang. Referee Simon Hooper chuan yellow card a pe zet a, VAR hmanga ennawn a nih hnuah red card a pe ta zawk a ni.

Second half ṭan a ni chiah tihin Ekitike bawk kan hmu leh. Ani hian box pawn aṭangin mawi takin a push goal ve thung a, si hnih faiin hma an hruai ta. Tin, Ekitike hian Community Shield aṭang khan Liverpool tana a game khelh apiangin goal a khung.

Si hnih faiin la chak lo zawk mah se, Newcastle United an ṭang hle a, kim lova khel an ni tih pawh a hriat loh. Minute 57-ah set piece aṭangin goal an khung ve. Valentino Livramento aṭanga ball chhuak chu Bruno Guimaraes chuan a tauh goal, 2-1 a ni. Beiseina an nei thar a, an phur hle.

Hun tawp dawn minute 2 a la awmin Magpies chuan an siphurh an rul ta nge nge. Goalkeeper Pope chuan defensive third aṭangin ball a chhuih thlawk, Liverpool box chhungah William Osula chuan dawngin, Alisson kap karah a chhuih goal a, 2-2 a ni ta.

Hun pangngai a zo a, minute 11 lai pek belh a ni. Hetah hian Liverpool rawlthar Rio Ngumoha chuan chakna goal a khung. 90+10 minutes a ni a, mual dinglam sir aṭanga Mohamed Salah ball cross chu Szoboszlai chuan Rio Ngumoha tan a kian, ani hian box chhung veilam aṭangin ṭha lutukin a dah goal a, hun a tawp chhunzawm. 3-2 in Liverpool chuan hnehna an chang ta a ni.

Newcastle United hian an theihtawp an chhuah a, kim lo chung pawhin an inhnehtawkpui ṭep nghe nghe. An game hmasa berah Aston Villa nen goal awm loin an inhnehtawk. Tun season Premier league game hnih aṭangin shots vawi 26 lai an nei thei, hetih lai hian an striker goal khung khawl Alexander Isak a khel ve si lo a, an chance neih te an ti goal thei ta lo hlawm a ni ber mai.

Liverpool hian an game hnih aṭangin goal 4 lai an chhuah nghal. An hmatawng te an ṭha a, an tlarhnung te erawh title humhim tur chuan an insiamṭhat deuh hlek chu a ngaih dawn hmel. Van dijk hi defender ṭha tak ni mah se, kum 34 a ni ve tawh a, a ṭuan a fum deuh tawh niin a lang.

Ekitike kan fak lo thei lo, Isak la thei lo mah se, ani hi rinrawlah a hman theih dawn. Crystal Palace, Bournemouth leh Newcastle United lakah goal khat ṭheuh a khung. Hetih lai hian Isak la thei ngat phei selang chuan, Liverpool hmatawng an hlauhawm khawp ang le.

Inkhelh zawhah Newcastle United head coach Eddie Howe chuan, "Ka hlim a, ka lawm lo bawk. Kan khel ṭha hle. Duhthusamin kan khel a, first half-ah phei kha chuan kan khel ṭha tak zet. Inkhelh kan thunun a, nawr pawh kan nawr hle nghe nghe.

"Nawr viau mah ila, kan harsatna chu goal khung a ni. Chutih mek laiin goal ho takin kan chhuah a, goal hmasa zawk phei kha chu kan ngaihven tawk lo deuh bawk a ni. Second half ṭan a nih khan, min rawn nawr na nghal hle. Player te ka thiam lo hauh lo," tiin a sawi.

"Alex chu khelh ngat selang chuan danglamna a thleng ngei ang, hnehna kan chan ngei pawh ka ring bawk. A tel lo pawhin ṭha takin kan khel a, goal khan danglamna a siam mai chauh a ni. Tin, kan neih chhun ho hmang hian theihtawp kan chhuah zel ang," tiin Howe chuan a sawi bawk a ni.

Liverpool boss Arne Slot chuan, "Kan khel ṭha tawk lo. An goal bul kan thlen khan kan tisual leh ṭhin. Cross kan nei ve nual a, khang te kha player hnung zelah a ni hlawm bawk.

"Second half lama kan attack kha chu a ṭha e. 2-0 a hma kan hruai hnuah min rawn rul a, chutih laiin kum 16 miin chakna goal a khung a, a lawmawmin a ropui khawp mai.

"Chance ṭha tak a hmu a, kum 16 mi chauh pawh nise, ṭha takin goal-ah a chhuih lut. Kum 16 mi pet pawh a ang lo hial, a inringtawk em em a ni," tiin a sawi.