Liverpool chuan hun rei tak an captain lo ni tawh Jordan Henderson an chhuah avangin captain thar an nei a, Virgil van Dijk chu Liverpool hian an captain thar a nih thu puang a, kum 24 mi Trent Alexander-Arnold chu vice-captain atana ruat a ni bawk.

Kum 2015-a Steven Gerrard a chhuah hnuah Henderson hi Liverpool captain a ni tan a, kum riat zet liverpool captain arm band a hren hnuah tun thla khan Saudi Pro League club Al Ettifaq panin Anfield a chhuahsan.

Henderson bakah hian an Liverpool vice-captain James Milner pawh a contract a hman zawh avangin tun nipui chhungin a inpu chhuak tawh a, Van Dijk leh Alexander-Arnold te chuan Henderson leh Milner te hmun kalsan an hnawhkhat.

Netherlands captain ni bawk Van Dijk chuan, “Ka tan mai bakah ka nupui leh ka fate leh ka chhungte tan a lawmawm em em a, a nawm dan a dangdai hle. Holland captain ka ni sa a, hei pawh hi a hlu ka ti em em a, tunah Liverpool captain atana ruat ka ni leh hi ka lawmzia tawngka in ka sawi chhuak thiam rih lo,” tiin Liverpool captain thar a nih chungchang a sawi.

Kum 2018 khan Southampton atangin kum 32 mi hian Liverpool a pan a, Liverpool tan hian game 200 chuang khel tawhin, Premier League, Champions League, FA Cup, Carabao Cup, UEFA Super Cup leh Club World Cup te a chawi tawh a ni.