A vawikhat nan 29th November 1998 khan Steven Gerrard hian Liverpool tan inlan in a game hmasa ber a khel a, Liverpool player pawimawh ni chho ngar ngar in, LA Galaxy zawm turin 2015 khan Liverpool a chhuahsan. Liverpool tan hian match 710 khel hmanin goal 186 a khung a, nomawi 9 a chawi tawh bawk. MSL lamah season khat hun hmangin football a chawlhsan zui.
February thla atangin Liverpool chuan 'Captain Fantastic' a hmu leh dawn e.
Goal.com in a tarlan danin Steven Gerrard hi player angin a lo let dawnlo a, Liverpool Youth Coach a ni thung tawh dawn. A hna thar tur hi February atangin a thawk tan ang. A inkhelh chhungin player tha tak a ni tih kan hre theuh awm e, coaching line-ah engnge a an dawn tih hriat a chakawm tawh hle.
Gerrard hian UEFA ‘A’ licence neih tumin hma a la mek a, tun atanga reiloteah a hmuh thuai a rinawm. Youth coach atanga in tuai hriamin, nakin lawkah Liverpool first team a enkawl thuai a beisei awm hle.
A hna thar chungchang sawiin Gerrard chuan, "Nun bul ka tan naah ka let leh ni berin ka hria. Ka hlim tak zet a, Liverpool chhungkaw chungah ka lawm em em bawk.
"Lunglen vang emaw a helai hmun hi rawn pan leh ka ni lo a, 'Liverpool tan engnge ka tih ve theih?' tih lam zawk. He club hian ka thinlungah hmun pawimawh tak a chang a, Liverpool hi ka tan engnge a nih sawi nawn a ngai tawhlo. Hei hi ka hna tur a ni tih fiah ka duh a, tichuan nasa takin ka hmangaih hi ka pui thei bawk ang.
"Liverpool Academy director Alex Inglethorpe nen in biakna kan nei a, an hna thawh mek dante ka hmuh bakah tum fel tak anneih bawk avangin minti phur em em a ni. A hun takah duhthlan tur diktak ka thlang niin ka hria.
"He ka hun tha neih hi hmang tangkaiin coach tha tak kala nih ve ngei ka beisei. Ka thiamna, ka theihna leh ka tawnhriatte naupang hnen a ka hlan chhawng theihna hun tha ka nei hi ka lawm a, chu chuan keimah ngei pawh minpui nasa hle dawn a ni,"tiin a sawi.
Liverpool-ah Gerrard a lo let leh dawn a, he hmunah hian player a nih laiin sulhnu duhawm leh hriatreng tlak tam tak a hnutchhiah tawh a ni. Tun tumah coach ni turin a lo let ang. Footballer tha tam tak hi coaching lamah hlawhchham an awm ve nawk a, Gerrard hian eng chen nge a thlen dawn tih hriat a chakawm tawh hle.