Florian Wirtz chuan Liverpool a zawm fel ta a, a man hi £116m niin, Liverpool-in an player lei tawh zawng zawng zinga man to ber a ni.

Kum 22 mi hian kum 5 chhung atan Anfield-ah contract a ziak a, zirtawpni khan medical te neiin, zanlaiah phochhuah a ni.

Liverpool hian £100m an pe phawt ang a, a khelh that chhoh dana zirin £16m add-ons an la pe dawn. Liverpool player man to ber kha Virgil van Dijk kha a ni thin a, kum 2018 khan Southampton atangin £75m in an la lut a nih kha.

Wirtz hian add-ons hi a hlawhchhuak thei ang em? A hlawhchhuak a nih chuan British record transfer fee a ni dawn tihna a ni. Chelsea khan kum 2023 khan Benfica atangin Enzo Fernandez kha £107m in an lei a, kha record kha a khum thei maithei a ni.

Wirtz hian Bayer Leverkusen tan game 197 atangin goal 57 a khung a, Liverpool hian Dutch right-back Jeremie Frimpong chu £29.5m in thla hmasa khan an la lut tawh a, Wirtz hi tun nipui bazara Liverpool player lak luh pahnihna a ni ta a ni.

"Kum tin trophy hlawhchhuah ka duh dawn. A hmasa berah chuan, hna tha takin kan thawk ang. Season liamta khan Liverpool hi Premier League champion an ni a, tuna ka tum ber chu champion nawn a ni. Chumi zawhah Champions League no mawi chawi a ni, ka tum hi a ruh em em.

"Ka hmaa zinkawng eng tak ka hmuh hian, ka phur em em a ni. Ka nunah hun thar a inher chhuak a, thil danglam tawn ka chak a, Bundesliga atangin Premier League-ah ka insawn ta a ni.

"Liverpool team-ah hian ka len halh ka ring a, a tha thei ang bera ka khelh theih ka inring. Liverpool player te pawh ka lo be tawh hlawm a, tha taka ka khelh theih an ring ve hlawm bawk. Ka game hmasa ber khelh hlan ka nghakhlel a ni," tiin Florian Wirtz chuan a sawi.