Liverpool-a a contract hmang zo mek Virgil van Dijk chuan, contract thar zawrh leh zawrh loh chungchangah thuthar a awm loh thu a sawi a, season zawhah hian Liverpool chu nasa takin a insingsa dawn tih a sawi tel bawk.

Jurgen Klopp-a'n Anfield chhuahsan a tum avangin Liverpool chuan manager thar an zawng char char a, Slot an be fel tawh nia report a ni. Manager thar hnuaiah hian Liverpool captain hi a awm chhunzawm zel ang em? Tih chu zawhna lian tak a nih mek laiin, Van Dijk chuan Liverpool era thara tel ve chhunzawm zel a tum thu a sawi chiang.

"Contract thar chungchangah chuan thu thar engmah a nei lo. Tun dinhmunah kan club hi kan thil dang ngaihtuahin a buai em em, manager thar te kan nei ang a, chumi lam chuan kan rilru a luah ber zawk.

"Hetah hian ka hlim a, he club hi ka hmangaih bawk. Tin, he club hi ka nuna bet tlat a ni chho tawh bawk. Kan rilrua awm ber ni ta chu, kan game khelh hmabak pahnih hi a ni. Chumi hnuah manager thar kan nei ang a, Liverpool hi kan insingsa dawn a, team tharah pawh Liverpool player nih zel ka la duh dawn a ni," tiin Van Dijk chuan a sawi.

Arne Slot chu Liverpool manager thar tur nia report a ni a, hetih lai hian official-a puan a la ni lo. An manager thar chungchang zawh a ni a, Van Dijk chuan, "Slot hi kan manager thar tur a ni em? Engmah official-a puan a la awm lo a, titi lengvak mai chauh a la ni e.

"Season a zo ang a, thu thar kan nei mai dawn a ni. Season thar atan kan rilru kan pe chho tan tawh ang a, a phurawm chho dawn khawp mai, he club chhungkaw zinga tel chhunzawm zel ka la duh dawn a ni," tiin a sawi.