Khawvela footballer ropui ber tia sawi Lionel Messi chu vawiinah hian kum 34 a ni ve ta a, a upat belh niah hian a chanchin thenkhat han tar lang ila.
Leo Messi tia koh bawk Lionel Andrés Messi hi June 24, 1987 ah khan Argentina rama Rosario khuaah a piang a. Naupang te a la nih lai atangin football a khel tan a, 1995 kumah khan Rosario khuaa football club lian Newell’s Old Boys youth team a zawm tan a ni.
Lionel Messi chu naupang dangte aiin a danglam nghal a, a thiamna hmu apiangin hmuhnawm an ti a, Europe khawmualpui lam atang pawhin an ngaihven phah a. Kum 13 a tlin khan Spain ram lamah kalin FC Barcelona Under-14 team ah a khel tan a. Junior team tan hian game 14 khelhah goal 21 zet mai a thun thei a, team sang zawkah a kai chho vat mai a ni.
Kum 16 a tlinin FC Barcelona senior team lamah an telh tan a, friendly match an khelhin khelmualah a inlan ve a. 2004-05 season-ah khan kum 17 mi Messi chuan league goal a thun a, Spain rama league sang ber La Liga huanga player naupang ber a nih theih bakah goal thun thei naupang ber a ni bawk a ni.
Pa sang tak a ni hran lo a, feet 5 leh inches 7 chauh niin, kg 67 a rit a ni bawk a. Lian lem lo mah se a che a rang a, a chak a, khelmualah a hlauhawm thei em em mai a. A ke vei lam hmangin ball chu duhtawkin a khawih thei a, lehlam pawl defender te chu a pal darh nasa thei hle.
2005 kumah khan Spain ram khua leh tui nihna an pe a, a kum lehah Lionel Messi chuan Barcelona chu UEFA Champions League title a lakpui a. Hma a sawn chho zel a, 2008 kumah khan khawvela footballer langsar ber pawl a ni tawh a, 2008 FIFA World Player of the Year an thlanah pawh Manchester United star Cristiano Ronaldo chiah tluk loh a nei a ni.
2009 ah khan Messi chuan Barcelona chu trophy pathum a lakpui a, La Liga title an lak bakah Copa del Rey trophy leh Champions League trophy an la thei a. He mi season chhung hian Messi chuan game 51 khelhah goal 38 a thun a, Cristiano Ronaldo khumin FIFA World Player of the Year a ni chiang hle.
2009-10 season chhungin Messi chuan goal 34 a thun a, Barcelona chu La Liga title a lakpui leh a. Europe khawmualpuia inelna lamah goal a thun hnem ber a, Golden Shoe a dawng a, 2010 World Player of the Year dawng thei tura chhawp chhuah zingah a tel a. He chawimawina hming hi he mi kumah hian Ballon d’Or tiin an thlak a ni.
2012 kumah khan Messi chuan kum 40 zet record lo awm tawh, German footballer ropui Gerd Muller-a record siam a khum a. Gerd Muller khan season khat chhungin goal 85 a thun thei a, 2012 season-ah Messi chuan goal 91 zet thunin record ding lai chu a khum chiang hle a. He mi kuma a goal thunte chu La Liga goal 59, Champions League goal 13, Copa del Rey goal 5, Supercopa goal 2 leh Argentina tana goal 12 te an ni.
2019 kumah khan Cristiano Ronaldo leh Virgil van Dijk te khumin a vawi 6-na atan Ballon d’Or a dawng a, he chawimawina dawng hnem ber record thar hi a siam a. He mi kumah hian La Liga title a lak bakah Champions League goal 12 thunin European Golden Shoe a dawng bawk a ni.
Lionel Messi hian Brazilian legend Pele record pawh a khum tawh a. Pele khan 1956 leh 1975 inkarah a khelhna club Santos tan goal 643 zet a thun a, club pakhat tana goal thun hnem ber record a siam a. Messi chuan he record hi Barcelona tana game 749 a khelhnaah a khum a, tun dinhmunah game 778 khelhah goal 672 zet chu a thun tawh a ni.
Tun dinhunah Lionel Messi hian Barcelona chu trophy 34 lai a lakpui tawh a, hengah hian La Liga title 10, UEFA Champions League trophy 4, Copa del Rey trophy 7 leh Club World Cup trophy 3 te chu an tel a ni.