Chelsea striker Liam Delap chu November thla velah training a ṭan leh thei dawn a, a kaihza hliam hi zai a ngai lo nia report a ni.

November thla vela training a zawm theih chuan, December thla fixture hautak laiin a chhawr theih dawn niin a lang a, Chelsea tan chuan a lawmawm dawn tho e.

August ni 30-a si hnih faia Fulham an hneh ṭum khan Delap hian kaihza hliam a nei a, Tyrique George chuan a thlak. Inkhelh zawhah Chelsea boss Enzo Maresca chuan hun rei tak a chawlh a hlauh thu a sawi chhuak a nih kha.

Nicolas Jackson chu loan-in Bayern Munich lamah an tir, Delap a lo inhliam leh chiah bawk si. Chelsea chuan an forward hi koh kir leh an tum a, mahse Jackson chuan German club zawm tho a duh avangin loan-a an inhawhna chu an tifel ta nge nge a.

Chelsea chuan Delap a inhliam avang hian England Under 21 international Marc Guiu chu an ko kir a, ani hi tun season chhung atana Sunderland pan tura tih ni mah se, Stamford Bridge lamah a kir leh ta zawk a ni.

Delap hian Champions League match tir lam a hmaih nual dawn a, Bayern Munich pawh a hmachhawn thei dawn lo a ni. Premier League fixture pawimawhah Liverpool leh Tottenham a hmachhawn thei dawn lo bawk.

Tun nipui bazar inhawn lai khan Chelsea chuan Ipswich Town aṭangin Delap hi £30million-in an lei a, Club World Cup-ah game 6 a khel a, goal 1 a khung ve. Premier League match hmasa pathumah vawi hnih inkhelh bul a ṭan bawk.