Sunday zanlai khan, La Liga inkhelah Barcelona chuan Real Sociedad an tlawh a, 4-1 in Barcelona hian hnehna an chang.

Barcelona tan hian an striker thar Lewandowski chuan goal hnih a khung a, an inkhelh ni hi Spain-ah chuan Lewandowski-a piancham a ni a, hei hi Barcelona tana a goal thun hmasak ber a ni nghe nghe a ni.

Lewandowski-a’n goal hnih a thun bakah hian Ousmane Dembele leh Ansu Fati te chuan goal khat ve ve an thun bawk a, Sociedad goal neih chhun Alexander Isak-a thun a ni ve thung.

Barcelona hian khelh hnih atangin point 4 an hlawhchhuak tawh a, panganaah awmin, Sociedad hian khelh hnihah point 3 neiin sawmnaah an awm ve mek bawk.

Inkhelh tan atanga minute khat pawh an khelh pum hmain Lewandowski chuan Barcelona tana a goal hmasa ber a khung a, Alex Balde chuan veilam atangin Lewandowski hi ball a pe a, Polish striker hian 43seconds an khelhin Barcelona hmahruaina goal a khung nghal.

Barcelona hian hma an hruai rei lo hle a, minute nga hnuah mual neitu lam hian an si phurh an rul nghal. Frenkie de Jong chu ball chhuhsak a ni a, David Silva chuan Isak pe in, Isak-a ball chhuih chu Eric Garcia-a’n lo khawih mah se, goal-ah a lut chhunzawm a, 1-1 a ni.

Goal a luh belh lo reng a, darkar khat chuang an khelhin, bench atanga Ansu Fati dah luh a ni a, Fati hian assist a nei zui nghal bawk. 66mins-ah Fati-a ball khen chu Dembele-a’n goal-ah a lo chantir a, a vawi hnih nan Barcelona in hma an hruai.

Minute hnih hnuah Fati hian assist a nei leh a, Pedri-a’n tha zet ball a pek chu Fati hian Lewandowski chawm nan a lo hmang ve leh a, kum 34 mi hian harsat awm lovin Barcelona goal thumna a khung. 80mins hma chiahin, Lewandowski hian Fati a chawm let ve leh a, Fati hian goal khungin, 4-1 in Barcelona hian point thum an hlawhchhuak ta a ni.