Tottenham striker Harry Kane chu, nipui bazar inhawn hunah Manchester United player lak tum ber ni mah se, United hian harsatna lian tak an nei dawn niin a lang.

Kane hian United hi zawm a hnial lo niin chanchinbu mite chuan an ziak a, United hian England captain hi an lakluh theih beiseiawm hman viau mah se, Tottenham chairman Daniel Levy chuan United hnenah an player tha ber hralh chhuah a duh lo niin chanchinbu mite chuan an ziak.

Kane hian Totttenham-ah season khat daih chiah contract a nei tawh a, Tottenham hian contract thar zawrh mahse Kane hian a la hnawl zel rih niin a lang. Tottenham hian la ui viau mah se, nakkuma a thlawna an chan mai loh nan kuminah kum 29 mi hi an hralh a rinawma, a man erawh an chhiar to dawn.

Kane-a man hian pound maktaduai 100 a pel tura ngaih a ni a, pound maktaduai 120 pawh hawlh chho thei tura ngaih a ni bawk. United hian a man tur pawisa nei mah se, Levy an hmin thei dawn em tih chu zawhna lian tak awm mek a ni.

Kane hi ram dang club te pawhin an duh a, Tottenham hian pound maktaduai 100 bawr chho vela Kane dawrtu, ram dang club an hmuh chuan England pawnah Kane hi an hralh zawk a rinawm hle niin chanchinbu mite chuan an tarlang.

Kane hi Premier League striker tha ber zinga mi a ni a, tun season-ah khan Tottenham che tha lo mah se, Kane hi a mimalin a che tha hle a, goal 30 lai khungin, Premier League top scorer Erling Haaland chu goal 6 chiahin a pha lo a ni.