Bayer Leverkusen chuan Erik ten Hag chu an head coach thar a nih thu an puang.

Xabi Alonso chuan kum hnih leh a chanve a enkawl hnuin Real Madrid lam a pansan a, Bundesliga club hian Manchester United boss hlui Erik ten Hag hi kum 2 chhung atan contract an ziahpui ta a ni.

Nikum October thla khan Manchester United chuan Erik ten Hag hi an ban a, hna nei loin a awm ngar ngar a, tunah chuan hna thar a nei leh ta. Ten Hag hi Germany-ah a mikhual lo a, kum 2013 leh 2015 inkar khan Bayern Munich II manager a lo ni tawh a ni.

Manchester United a enkawl laiin Ten Hag hian 2022-23 Carabao Cup a chawipui a, chumi hnuah FA Cup a chawipui leh. 2024-25 Premier League game 9 a khelhpui a, United chu 14-na a nihpui. Hei vang hian United chuan an ban a, Ruben Amorim chu an manager thar atan an la lut.

Ajax a enkawl laiin Ten Hag hian Eredivisie title 3 a la a, kum 2019 khan Champions League semi final a luhpui a, khami season khan Real Madrid leh Juventus te an hneh a ni.

2023-24 season khan Xabi Alonso chuan Leverkusen chu Bundesliga title hmasa ber a chawipui a, DFB-Pokal a chawipui bakah, Europa League final a luhpui bawk a, Atalanta lakah an tlawm hlauh.

Tun season liamta khan Leverkusen chuan trophy an chawi lo a, Bundesliga-ah 2-na niin, champion Bayern Munich chu point 13 laiin an thlau a ni.