Leny Yoro chu UK lam panin a thlawk a, Manchester United-ah medical a nei dawn niin The Athletic chuan a tarlang.

Leny Yoro man chungchangah hian Lille leh United te chu €62million (£52m; $67.9m) velin an inrem tawh a, Yoro hian Manchester United a thlan erawh a la ngai nia report a ni.

Yoro pan chak ber chu Real Madrid an ni a, hetih lai hian Real Madrid lam hian lak luh tak tak an tum lem lo nge, an la reh deuh vung vung.

Kum 18 mi France youth international contract hi nakum June thla hian Lille-ah a tawp tawh dawn. French club hian free transfer-a chhuahtir ai chuan, tun nipui bazar inhawn lai ngeia chhuahtir an tum.

A man an chhiar to deuh avangin Real Madrid chuan an lei ngam lo nia ngaih a ni a, hetah hian Manchester United chuan hun tha an neih phah dawn ta niin a lang.

An tum anga United-in thil an kalpui chuan, tun nipui bazarah hian an duhthusam player pahnih chu an la lut dawn tihna a ni.

An hmatawng tih chak nan Manchester United chuan Bologna atangin Joshua Zirkzee an la lut fel tawh a, an tlarhnung thawmthatna tur tunah hian player an ngaihven mek.

Rafael Varane leh Kambwala an chhuak a, Victor Lidelof leh Harry Maguire te hma hun hi a chiang lo bawk nen, United chuan defender pahnih emaw tal lak tumin hma an la niin The Athletic chuan a tarlang.

Manchester United chuan Jarrard Branthwaite lak tumin vawi hnih Everton an dawr tawh, hei hi Everton chuan an lo hnawl ve ve a, mahse United hi an la beidawng mai lo a, beihpui thlak tumin hma an la leh dawn nia report a ni.