Leicester City chuan tun nipui atana an player thar hmasa ber tur an lei fel tep niin a langa, Lille atangin midfielder Boubakary Soumare chu an lei fel thuai dawn niin chanchinbu mite chuan an tarlang.

Leicester hian kum 22 mi Soumare manah hian add-ons nen zawng zawng pound maktaduai 18 vel an seng dawn niin tarlan a ni a, Soumare pawh hian Leicester-a luh ngei hi a duh niin sawi a ni bawk.

Soumare-a French pui Wesley Fofana chu Leicester-ah a khel sa meka, Fofana hian Soumare hi a sawm nasa hle niin sawi a ni a, Soumare-a’n Leicester a zawm chak chhan pakhat hi Fofana vang niin a lang.

Leicester hian Soumare an duhthu hi Lille hnenah an thlenna hi a rei tawh angrenga, mahse season a laklawh lai khan Lille hian indawrna kalpui an duh lova, Ligue 1 an champion takah chuan indawrna neiin, inremna pawh a thuphung chuan an nei tawh niin sawi a ni.

Soumare hi la naupang angreng viau mahse Lille player pawimawh a ni a, tun season khan Lille tan Ligue 1-ah game 32 lai khelin, Lille champion theihna kawngah tha a thawhhlawk hle a ni.

Soumare hi Paris Saint-Germain academy chhuak a ni a, PSG B team atangin kum 2017 khan Lille academy a zawma, hemi kum vek hian senior team tan a inlan zui nghal a ni.