King Power Stadium-ah Champion lai Leicester City chuan Manchester City 4-2 in an hneh a, Vardy chuan Leicester City tan a vawi khat nan hattrick a siam a ni.
Leicester City tan Vardy leh King ten goal an khung a. Manchester City tan hun tawp dawn lamah Kolarov leh Nolito ten goal an khung a ni.
Khelh 15-ah Manchester City chuan 30 points an nei a. Tottenham chuan top 4 atanga Man City pet chhuahna hun tha tak an nei mek. Tun season Premier League-ah Man City hi vawi 3 an tlawm ta a, vawi 3 an khingpui an inhnehtawkpui bawk.
Champions League lama rilru zawng zawng an pe ni maia ngaih Leicester City chu Premier League lamah an hnufual hman hle a. Hetih lai hian Manchester City laka hnehna an chan avangin relegation zone atangin point 4-in an him a, table-ah 14-na an ni mek.
Leicester City 4-2 Manchester City
(Vardy 3', 20', 79', King 5') (Kolarov 82', Nolito 90')
PLAYER RATINGS (data source : opta)
LEICESTER CITY: Zieler 7, Simpson 7, Morgan 7, Huth 7, Fuchs 7, Mahrez 8, King 8, Amartey 7, Albrighton 7, Slimani 8, Vardy 9. Subs: Okazaki 5, Gray n/a, James n/a.
MAN CITY: Bravo 5, Sagna 5, Zabaleta 5, Kolarov 5, Stones 4, Fernando 6, Gündogan 5, Navas 5, De Bruyne 6, Silva 5, Iheanacho 6. Subs: Sterling 6, Toure 6, Nolito 6.
Inkhelh tan atanga minute 3-na lekah Leicester City chuan Vardy hmangin goal hmahruai an khung. Ball kang tha zet chu Mahrez chuan Slimani tan a tawk keuh, Slimani chuan Vardy tan through ball tha zetin a pe chhunzawm nghal a. Vardy chuan box chhung atangin a pet goal ta a ni.
5 mins-ah goal hnihna a lut chhunzawm a. Box chhung atanga Slimani ball pek tha zet chu box pawn atangin Andy King chuan top corner-ah a pet goal. Si hnih faiin Leicester City chuan hma an hruai. 20 mins-ah Vardy chuan a goal hnihna a khung a.
Vardy leh Mahrez inkawp kha kan hmu leh. Long ball tha zet chu Mahrez chuan vawi khatah tawk kawi zeuhin Vardy tan ball tha tak a pe a, heta Mahrez ball pass hi chu a World class chiang kher mai. Vardy chuan Bravo a bum hnuah awlsam takin a pet goal ta a ni.
Second half 78 mins-ah Vardy chuan hattrick a siam ta nge nge a. Stones back pass sual chu Vardy chuan nangchingin angle tawt tak karah a pet goal chiah chiah a ni. Hun tawp dawn minute 8 a la awm tihin Manchester City chuan free kick an hlawh chhuak a. Kolarov chuan a ke veilamin mawi takin a thuai goal.
90 mins-ah Kolarov siam tha zet chu Nolito chuan goal-ah a chantir ve leh a, mahse Man City hian goal an khung tlai mah mah, hun a tawp ta, 4-2 in Leicester City chuan hnehna an chang ta a ni. Leicester City hi champion lai an ni a, mahse tun season-ah erawh an tlahniam rawih rawih. Champions League lamah an rilru an pe niin a lang? Premier League lama an hnufual em em laiin Champions League Group Stage erawh an khel tha hle a, group winner an ni nghe nghe.
Champions League lamah an hna hmasa an hlen phawt a, Premier League game an khel leh chiah chu a dang ta zar mai. Champion khelh dan ang chiah khan an khel leh ta a ni ber mai. Foxes hian long ball an hmang nasa a, counter attack hmangin an nawr thut thut, Manchester City tlar hnung ten an chelh lo a ni.
Mahrez, Vardy leh Slimani te an khel tha hle a, an inkawp fuh kher mai. Second half tir lamah Manchester City hian na takin nawr mahse Foxes tlar hnung an ding khawng a. First half-a goal thum an chhuahnaah khan Man City goalkeeper Bravo kha a position chu dik selang chuan goal thum em em a chhuah a rinawm loh bawk a ni.
Pictures credit : Reuters