Manchester United, Liverpool, Newcastle United, Aston Villa leh West Ham ten an ngaihven nia sawi Kalvin Phillips chuan Leeds United-ah contract thar ziah a duh niin Mirror chuan a tarlang.

Phillips-a contract hi kum 2024 June thlaah a tawp dawn a, kar khatah £25,000 vel a hlawh nia report a ni bawk. Leeds United hi Premier League-ah an inhamtang chho zel dawn em tih pawh a hriat loh. Chutih laiin a naupan tet atanga a club tan hian rinawm chhunzawm zel Phillips hian a thlang dawn niin Mirror chuan a tarlang.

Kum 2019 khan Aston Villa leh Burnley te chuan Kalvin Phillips hi £26million vela lei chhuah tumin an dawr a, hei hi amah Phillips-a'n a hnar nia report a ni a. Tunah pawh an club dinhmun a chhiat mek laia chhuahsan a tum lem lo niin English media-te chuan an tarlang.

Manchester United chuan West Ham atanga Declan Rice an lak theih loh chuan Phillips hi lak ngei an tum dawn nia report a awm ve mek bawk a, hetia contract thar a ziak dawn a nih chuan club dang tan beisei tur a awm tawh dawn lo niin a lang.

Hetih lai hian Leeds United leh Phillips te hian contract thar an ziak a nih chuan a man pawh a to phah sawt dawn a, football pundit te chuan man to taka an hralh theih nan Leeds United hian contract thar ziahpui an tum an lo ti ve mek bawk a. Nipui bazar a rawn inhawng ang a, thil chu a chiang kuar turah ngai ang.