Premier League club Leeds United chuan manager Jesse Marsch an bana, an manager thar tur an zawng nghala, tun dinhmunah Leeds enkawl tu tur hi sawi theih a la ni lo.

Leeds hian nikum February thla tawp lam khan American manager Marsch hi an ruai tana, season hmasa khan Premier League-ah 17-na niin, Premier League khel zel turin an inham tang hram.

Tunah hian Premier League-ah Leeds hian 17-na dinhmun an luah mek a, khelh 20 atangin point 18 bak an la hlawhchhuak lova, an result in hma a sawn theih meuh loh avangin kum khat hnuah Marsch hi an ban ta a ni.

Leeds hian season an hmang chhe hle a, thla thum chhung Premier League-ah chak an nei tawh lova, season kal mekah chak vawi li bak chak la nei lovin, Sunday liamta khan Nottingham Forest lakah si khat faiin an tlawm bawk.

Marsch an ban hnuah Leeds hi an manager hlui Marcelo Bielsa nen sawizawm an ni nghal a, mahse chanchinbu rintlak zawk te chuan Leeds hian Bielsa lak tumna tun dinhmuna an neih loh thu an tarlang ve thung.

Leeds hi 18-naa awm Everton nen an point a inang a, mahse khelh khatin an khel tam zawk. Leeds hian an game khelh leh tur pahnihah Manchester United chu Premier League inkhelah ve ve an hmachhawn dawna, tun kar Nilaini zanlaiah United hi an tlawh anga, Sunday zanah United hi an lo mikhual leh nghal dawn a ni.