Premier League club Leeds United chuan Barcelona atangin fullback Junior Firpo an lei fela, a manah pound maktaduai 12.8 vel an seng.

Firpo hi England-ah awm tawhin, a in quarantine zo fel tawh bawka, Leeds hian kum li daih contract lo ziahpuiin, Firpo-a contract hian kum 2025 June thla thleng a daih a ni.

Leeds hian an fullback Ezgjan Alioski chu an chana, Alioski hi Leeds hian contract thar ziahpui tum viau mahse an hlawhchhama, Alioski hi tun thla atang khan free-agent niin, Alioski thlak tu atan Leeds hian Firpo hi an lei.

Kum 24 mi Spanish left-back Firpo hi Real Betis chuan kum 2014 khan an academy-ah an laluta, Real Betis senior team lamah chho zuiin, kum 2019 khan Barcelona hian Camp Nou-ah an seng lut.

Barcelona hi an player te hlawh lama an indaih theih nan an theih ang angin an inpaih thawl meka, player chhuah tir tawh sa te bakah hian Samuel Umtiti, Miralem Pjanic leh Philippe Coutinho-te chu chhuah tir leh dan an ngaihtuah mek a ni.