Laver Cup khelh zawh a ni a, champion lo tura rinkai zawh Team World chuan Team Europe hnehin 2022 Laver Cup champion an ni.

Laver Cup hi kum 2017 atanga khelh tan a ni a, kum tin khelh thin niin, kumin hi an vawi nga khelhna a ni a, kumin 2019 khan ATP Tour event anga official-a pawm a ni a, mahse ATP Tour-a player te point-a chhiar tel a ni lo thung.

Ni thum chhung khelh thin a ni a, Team Europe leh Team World inhmachhawn thinin, nikhatah match li zel khelh a ni a, a ni khatnaah match tina chak zawkin point 1 hlawhchhuakin, a ni hnih niah match tina chakin point 2 an hlawhchhuak a, a ni thum niah match tina chak zawkin point 3 an hlawhchhuak thin bawk.

Heti hian point 24 hmuh theih a ni tihna a ni a, point 13 hmu hmasa zawk zawk team chu champion-a puan thin an ni.

Kumin Laver Cup-ah 13-8 in Team World hian Team Europe an hneh a, Sunday zan khan Team World player Frances Tiafoe chuan 1-6, 7-6 (11), 10-8 in Team Europe player Stefanos Tsitsipas a hneh a, Tiafoe hian Team World champion-na tur point a hlawhchhuak ta a ni.

Kumin Laver Cup hian kum dang zawng aiin ngaihven a hlawh a, hei hi a chhan chu Grand Slam title 20 la tawh Roger Federer-a’n a game hnuhnung ber a khelhna tournament a nih vang a ni.