Chelsea midfielder hlui Michael Ballack chuan tuna Chelsea manager Frank Lampard chu manager tawnhriat ngah ni lo chunga Chelsea-a a che tha thawkhat nghal chu mak a tih loh thu a sawi.

Lampard hian season liamta atang khan manager hna a thawk tan chauha, player angin tawnhriat ngah hle mahse manager khawvelah chuan la naupang ve tak a ni.

Season liamta khan Championship lamah Derby County a enkawla, Lampard-a hnuaiah Derby hian play-off final thleng nghalin Premier League-ah an inpet kai teuh hle.

Chelsea hian Lampard hi tun nipui khan an lalut chhunzawma, Chelsea hi bazar thei lo tura hrem an ni mek bawk nen Lampard hian hna hautak tak a nei a, mahse beisei aiin Chelsea hi an player hlui Lampard-a enkawlna hnuaiah hian an che tha a tih theih awm e.

Chelsea hian tunkar khan Carabao Cup-ah Manchester United an hneh lova, hemi hma hian a zawnin game sarih an chaka, Premier League lamah pawh an dinhmun a chhe lo hle.

Ballack chuan hun eng emaw chen Chelsea-a a lo khelhpui Lampard-a chungchang hi sawiin, “Lampard hi a che tha thawkhat viau hi mak ka ti lem lova, a chhan chu talent neih thata, football hriatthiama, mi thawkrim tak nih bawk chuan hlawhtling tur a ni a, Lampard hi player ang pawh khan a thawkrim em em a, coach ang pawhin a thawkrim ngei dawn tih ka hria.

“Inkhelh hmain a inpuahchah tha dawn tih ka hria a, chu chu manager tan a pawimawh em em a, tha taka inbuatsaih turin football a hrethiama talent a nei tha bawk. Manager hna thawh hi chu football hriatthiam chauh hi a ni lova, inbuatsaihna tha leh mihring pui enkawl thiam a ngai tel em em a, Lampard hian bul tan chauh mahse a zei nghal em em a manager tha tak a la ni ngei dawn in ka hria,” a ti.

Lampard leh Ballack-te hi season li chhung Chelsea-ah an khel duna, kum 2006 atang kum 2010 khan Stamford Bridge-ah hun hmang dunin Premier League title pakhat leh FA Cup vawi hnih an la hman a ni.