Inrinni zan khan Bayern Munich chuan 2016/17 Bundesliga season match hnuhnung berah 4-1 in SC Freiburg an hneh a, he match hi Bayern Munich captain Philipp Lahm leh midfielder Xabi Alonso te tan chuan football an khelh chhunga an match hnuhnung ber a ni ta a ni.
Lahm leh Alonso te hi Football khawvelah chuan trophy chawi hnem zing ami an ni a, kum 33 mi Lahm hi kum 2014 World Cup-a Germany champion puitu captain kha a ni a, Bundesliga champion tan hian Lahm hian game 517 a khel tling bawk a ni.
Kumin February thla khan Lahm hian football chawlhsan a tum thu a lo sawi tawh a, a hun pum deuhthaw Bayern Munich tan a hmang a. Thla hmasa khan Bayern Munich chu Bundesliga champion an ni tawh a, point 15 laia falin season an khar ta a, a zawnin Bayern Munich hi Bundesliga-ah vawi 5 lai an champion ta a, Lahm chuan champion no mawi nen football a chawlhsan ta a ni.
Lahmn hi full back leh midfielder angin a chhawr ve ve theih a, major trophy chu a chawi deuh vek. Bavarian club tan hian Domestic leh European trophy a chawi a, Bundesliga title phei chu 8 lai lain, Bayern legends Oliver Kahn, Bastian Schweinsteiger leh Mehmet Scholl te record a nihrual nghe nghe a ni.
Minute 5 a la awm tihin Lahm chu lakchhuah a ni a, Allianz Arena-a mipui sang tam tak chu mittui nen Lahm hian a vai liam ta a ni. Kum 11 lek a nih laiin Lahm hian Bayern Munich a zawm a, loan-a a chhuak tih loh chu Bayern Munich-ah a hun zawng zawng a hmang. Kum 2002 khan debut khelin chairman Karl-Heinz Rummenigge chuan Bayern Munich player ropui zinga chhiar tel a nih thu a sawi nghe nghe a ni.
Lahm hi Bayern Munich club Hall of Fame-ah lakluh a ni dawn a, kum 2008 khan a vawi khat nan goalkeeper Kahn chu lakluh a lo ni tawh a ni.
"Chawimawi hi a phu a ni, FC Bayern mi ropui zinga chhiar tel a ni e. Mual chhungah leh pawnah captain nih tling tak a ni a, club tan mi pawimawh tak a ni," tiin chairman Karl-Heinz Rummenigge chuan Lahm chungchang a sawi nghe nghe.
Liverpool leh Real Madrid midfielder hlui Xabi Alonso pawh tun season zawh rual hian a contract a zawh dawn avangin football chawlhsan zai a rel ta a, kum 35 mi Spanish midfielder hi 81 mins-ah lakchhuah a ni a, mipuiin ropui takin an lo lawm bawk a ni.
Alonso hi player ropui a nih zia lanna chu trophy chawi theih zawng zawng deuhthaw a chawi a, World Cup leh European Championship-ah Spain a champion pui bakah Champions League title pahnih a la a, domestic title 4 a la bawk a ni.
FC Freiburg an hneh tum hian goal hmasa ber chu a siam a ni a, a thiam thil a show leh ngei bawk a, a ball vawrh tha zet chu Robben chuan umin goal-ah a chantir chhunzawm a, Vidal, Ribery leh Kimmich ten goal an khung bawk a ni.
"Alonso hi kan player lakluh tawh zinga tun hnaia kan tihfuh ber pakhat a ni. Ani kan chhar hi kan vannei hle, a thiam em em a, a fing em em bawk a, player thiam danglam bik ka hmuh tlemte zing ami a ni," tiin Rummenigge chuan Alonso a fak a ni.
Source : bbc
Pictures credit : reuters