Major League Soccer club Los Angeles FC chuan, Chelsea striker Pierre-Emerick Aubameyang chu lakluh an duha, Chelsea pawh Aubameyang-a chungchangah hian an dawr tan tawh niin Spanish chanchinbu Relevo chuan a tarlang.

Chelsea hian kum 33 mi hi an chhawr tlem hle a, Champions League knock-out stage khel tur squad an puanah pawh Chelsea hian Aubameyang hi an ziak lut lova, Chelsea tan vawi li bak tun season-ah inkhel bul a la tan lo.

Champions League squad-a a awm loh hnu hian, Aubameyang hi club hrang hrang nen sawizawm a ni nghala, MLS Cup champion lai LAFC hian lakluh tumin an dawr hmasa ber niin a lang.

Aubameyang hi a club hlui Barcelona pawhin an duh niin chanchinbu mite chuan an tarlanga, thlasik bazar liamtaa pawh khan lakluh an tum zet nia sawi ni mah se, Gabonese striker hi Chelsea-ah a awm chhunzawm.

AC Milan pawhin Aubemeyang hi season tawpa lakluh an duh nia report a ni bawk a, Aubemeyang hian Milan-ah in lei tur a zawng mek tawh niin chanchinbu thenkhat chuan an tarlang nghe nghe.

Barcelona leh AC Milan te hian, Aubameyang hi an lalut duh a nih chuan season kal lai tawp hun an nghah a ngai a, LAFC erawhin tunah hian an lalut thei a, Aubameyang pawh hian America lama input luh a hnial a rinawm loh viau a ni.