2021-22 La Liga season chu weekend liamta khan tan a ni a, an game hmasa berah team lian pahnih Real Madrid leh Barcelona te chuan hnehna changin, champion lai Atletico Madrid pawhin point 3 an hlawhchhuak bawk.

Real Madrid hian Mendizorroza-ah Alaves an tlawha, 4-1 in Real hi an chaka, Real hian point 3 nen season bul an tan.

Real Madrid tan hian French striker Karim Benzema chuan goal hnih a khunga, Spaniard defender Nacho leh Brazilian forward Vinicius Junior-te chuan goal khat ve ve khung bawkin, Alaves goal neih chhun Joselu-a thun a ni.

First half-ah goal lut a awm lova, mahse second half tir teah Real hian hma an hruaia, Gareth Bale-a cross chu far post lamah Lucas Vazquez chuan lo changin, Eden Hazard a pe a, Hazard hian Benzema tan ball khengin, Benzema hian goal-ah a chan tir.

Hma an hruai atanga minute sawm pawh a ral hmain Real hian goal an khung belha, Luka Modric-a cross chu khawih per sak ni mahse near post lamah Nacho rawn lawrin, goal-ah a khunga, 2-0 in Real Madrid hma a hruaipui.

Darkar khat chuang hret khelh a nihin Real-in an goal thumna an khunga, Valverde chuan Alaves goal lamah ball khalh pheiin, Benzema a pe, Benzema shot hi Pacheco chuan lo dan sak mahse, a rawn let chu Benzema hian goal-ah a khung zuia 3-0 a ni.

3-0 a an hnufual hnu lawkah Alaves-in penalty an hlawhchhuaka, Joselu rawn penchhuakin, kum 31 hian an penalty hlawhchhuah chu goal-ah khungin, 3-1 a rawn ni.

3-1 hian inkhela  tawp dawn emaw tih tawh hnuah Real hian injury time-ah goal an khung belha, Vinicius chuan mual veilamah ball changin, Asensio a pe a, Vinicius hi box-ah a inpawt lut nghal. Bench atang lut hlim Asensio chuan David Alaba pe in, Real Madrid defender thar hian goal hmazawn lamah ball a pe a, Vinicius chuan lo tauh lutin, 4-1 in inkhel a tawp.

Alaves 1-4 Real Madrid

(Joselu 65’pen) (Benzema 48’, 62’, Nacho 56’, Vinicius 90+2’)

Player Ratings

Barcelona chuan Lionel Messi chhuah hnua an game hmasa ber khelin, Camp Nou-ah Real Sociedad an lo mikhuala,  4-2 in mual neitu lam Barcelona hi an chak.

Barcelona tan hian Martin Braithwaite chuan goal hnih a khung bakah Gerard Pique leh Sergi Roberto te chuan goal khat ve ve an khunga, Sociedad tan hian Jueln Lobete leh Mikel Oyarzabal te chuan goal khat ve ve an khung bawk a ni.

Barcelona fan-te chu Messi a chhuah avangin an rilru na a la reh thei lova, minute sawm an khelhin stadium chhunga mipui te chu ‘Messi, Messi, Messi’ tiin an au rual.

Barcelona hian 13mins-ah hma an hruai nghal teuh viaua, mahse Antoine Griezmann-a ball tauh chuan crossbar a per. Hemi hnu lawk hian Barcelona-in goal an khung ta tho a, Memphis Depay-a cross ball lo kal chu Pique-a’n goal-ah a lo tauh lut.

Half-time hma chiahin Barcelona-in goal an khung belha, Frenkie de Jong-a pass chu Dane striker Braithwaite chuan goal-ah chantirin, 2-0 in first half tihtawp a ni.

Darkar khat an khel chiah tihin 3-0 in Barcelona-in hma an hruaia, Jordi Alba cross chu Sociedad goalkeeper Remiro-a’n a ben chhuah hnuah Braithwaite bawk chuan goal-ah chantirin, a goal hnihna leh Barca goal thumna a khung.

80mins chuang hret khelh a nihin Sociedad lamin goal an rawn khung ve a, Lobete chuan Sociedad goal hmasa zawk a khung. Minute thum hnuah Sociedad hian goal an rawn khung leh nghala, yard 25 vela hlaah Sociedad hian freekick hlawhchhuakin, freekick atang hian mawi takin Oyarzabal chuan goal-ah ball a chhuih luta, 3-2 niin, Sociedad lamin beiseina thar an nei.

Sociedad lamin beiseina thar nei mahse goal an khung belh thei lova, injury time-ah Barcelona zawk hian goal an thun belh. Braithwaite chuan chak taka ball khalhin, Roberto tan tha zetin ball a cross; bench atanga dah luh Roberto hian goal-ah lo chantirin, 4-2 in Barcelona an chak ta a ni.

Barcelona 4-2 Real Sociedad

(Pique 19’, Braithwaite 45+1’, 59’, Roberto 90+1’) (Lobete 82’, Oyarzabal 85’)

Player Ratings

Season hmasa champion Atletico Madrid chuan tun season-ah an La Liga game hmasa berah Celta Vigo chu Balaidos-ah an tlawha, Atletico hian khual mualah 2-1 in hnehna an chang.

Atletico tan hian Angel Correa chuan goal hnih a khunga, mual neitu lam Celta Vigo tan Iago Aspas chuan penalty spot atangin goal a khung ve bawk. Inkhel tawp dawn lamah team hnih te an inti buai a, Atletico player Mario Hermoso leh Celta player Hugo Mallo te chu hnawhchhuah ve ve niin, player 10-in ve ve in team hnih te hian inkhel an khar.

Minute sawmhnih chuang hret khelh a nihin Atletico-in hma an hruaia, Lemar chuan midfield-ah ball khalhin, Correa a pe; Correa hian mawi zetin goal-ah ball a pet luta, 1-0 a ni.

Darkar khat khelh a nih hma deuhin Celta lamin penalty an hlawhchhuaka, Aspas chuan penalty spot atang hian Jan Oblak chu chiang taka bumin, Celta si phurh a sut.

Minute nga hnu velah Atletico hian hma an hruai leh nghala, counter attack hmangin Celta an nawr. Saul chuan Correa ball a pe a, Correa hian bottom corner-ah pet lut zuiin, 2-1 in inkhel a tawp a ni.

Celta Vigo 1-2 Atletico Madrid

(Aspas 59’pen) (Correa 23’, 64’)

Player Ratings