LA Galaxy-in Puig an lalut

05th August 2022, 11:08AM

Major League Soccer club LA Galaxy chuan, Barcelona atangin Spanish midfielder Riqui Puig an lalut a, kum thum daih contract an ziahpui.

Barcelona-ah Puig hian season khat daih contract la nei mah se, Galaxy hian free transfer-in an lalut a, karleha kum 23 tling tur Puig hian kum kaw hnuah Barcelona a chhuahsan.

Barcelona hian a thlawnin Puig hi LA Galaxy zawm tir mah se, lei let leh theihna an nei dawn a, an lei let lova Galaxy hian club dang hnenah Puig hi an hralh a nih chuan, an hralhna zat atanga 50% chu Barcelona hian an chang bawk dawn a ni.

LA Galaxy head-coach Greg Vanney chuan, “Riqui hi player technical em em leh fing tak a ni a, a kum angah chuan tawnhriat ngah tak a ni bawk. Kan khelh dan leh kan team-ah hian a insiamrem nghal ka beisei a ni,” tiin Puig an lakluh chungchang a sawi.

Barcelona hian an hlawh pek chhuah zat an tihhniam a ngai hle a, Puig an chhuah tir chhan ber pawh niin a lang. Barcelona hian tun nipui bazar chhungin Philippe Coutinho, Oscar Mingueza, Dani Alves leh Rey Manaj te chu a nghetin an chhuah tir tawh a, Francisco Trincao leh Clement Lenglet te chu loan-in an chhuah tir tawh bawk.

Puig hi Barcelona academy La Masia chhuak a ni a, La Masia-a kum nga a awm hnuah kum 2018 khan senior team-ah awm tanin, competition hrang hrangah Catalan club tan hian vawi 56 a inlan hman a ni.

Copyright © inkhel.com 2022. All rights reserved.