Manchester United sum lak luh a pung chho nasa hle a, kum danga an lak luh aia tam daih nikum khan an la lut.

United hian anmahni record an khum a, an sum lak luh tam ber kum tawngin, mual chhungah result tha nei lo mah se, nikum khan financial revenue £666.5m lai an nei a ni.

Season liamta khan Manchester United hi Premier League-ah 15-na an ni a, 1973-74 season-a an relegate hnua league-a an chetchhiat ber tum an tawng.

Heti chung hian an sum lak luh erawh a pung zel tho mai. Snapdragon nen kum 5 chhung atan kawr hma sponsorship inremna an nei a, he an inremna hi £333.3m lai a ni. Tin, kumin June thla thleng khan matchday atangin kum khat chhungin sum £160.3m  an la lut bawk.

"Hun harsa tak kan tawh lai pawhin heti zat sum kan la lut thei a, hei hian kan club ngelngheh zia a tilang chiang a ni. Tun season-ah pawh kawng eng kimah hmasawn kan tum chho mek bawk a ni," tiin United chief executive Omar Berrada chuan a sawi.

Kumin January thla khan Deloitte-in rank a siamah Manchester United chu club sum la lut tam zingah 4-na a ni a, nikum hmasa khan United hian £651m lai sum an lo la lut a nih kha.

Real Madrid chuan nikum hmasa khan £883m an la lut a, Deloitte rank-ah pakhatna niin, Manchester City (£708m) leh Paris St-Germain (£681m) ten an dawt a ni.

Kum hnih liamta chhungin United chuan an sum hman nasatna tam tak an tihniam a, hnathawk mi 1,100 atangin 700-ah an ti hniam a, an ei leh in bakah, Krismas an hman dan thlengin an sum dinhmun siamthat nan an inhrek a ni.

Champions League an khelh loh kum a ni a, Premier League-ah pawh an che ropui lo chho zel bawk a. Heti chung hian nakkum June thlaah chuan United hian  £640m atanga £660m vel sum an la la lut thei dawn tho niin BBC chuan a tarlang.