Football player tan chuan champion hi a hlu em em, trophy lak tam te hi ropuina a ni a. Hetih lai hian champion mawlh mawlh mah se, a hlawh a tlem si chuan atan awmzia a nei dawn chuang lo a. Footballer te inkhelh chhan chu pawisa a ni tih hi hre nawn leh ila, player thenkhatin sum an lo um deuh a nih pawhin dem tak tak theih an ni bik lo.

Kumin 2023 chhunga footballer hlawh hnem 11 thlang chhuak dawn ta ila, heng an sum lak luh hi an khelhna club atanga an hlawhchhuah mai bakah, sumdawnna dang atanga an lak luh te nen a tel vek a, club atanga an hlawh ngawr ngawr a ni lo tih kan hre hmasa dawn nia.

11. Robert Lewandowski

Kum 35 mi Robert Lewandowski hi a career tawp lam a hnaih chho tawh e kan tih laiin, season liamta khan goal 33 lai a khung leh a, Barcelona chu La Liga title a lakpui a nih kha. Kum upat lamah a la fei ngat ngat hle, Europe-ah pawh striker hlauhawm ber zinga chhiar a la ni mek zel bawk. Field chhung leh pawnah a sumdawnna a zauh zel a.

Kumin April thla khan Polish captain hian a sumdawnna enkawl turin CAA a ruai hial a, tunah hian sumdawnna lamah partnerts 8 a nei a, chung zingah chuan Nike, Spotify leh Oanda te an tel a, kum 35 mi a ni tawh mah se, Barcelona atangin kum khat chhungin $24 million a hlawh a, field pawn lama a sumdawnnaah kum khat chhungin $10 million vel a hlawh nia tarlan a ni a, kum khat chhungin field chhung leh pawn atangin $34 million vel a la lut nia tarlan a ni.

10. Harry Kane

Kum 30 mi Bayern Munich striker Harry Kane chu footballer sum la lut hnem 10 zingah a lang phak a, England international hian kum khat chhungin Bayern Munich atangin 26 million dollars a hlawh a, field pawn atangin 10 million dollars a hlawhchhuak bawk a. Field chhung leh pawn atangin 36 million dollars a hlawchhuak. Tottenham striker hlui hian tun nipui bazar inhawn lai khan Bayern Munich a pan a, kum 4 chhung atan contract a ziak.

Kane hian sumdawnna lamah pawh huang a zauh zel a, Fanatics nen kum eng emaw zat chhung atan inremna an ziak bawk a, company dang dang te nen pawh an thawk ho bawk a ni. Field chhungah pawh a che tha em em, Bundesliga-ah game 15 a khelh atangin goal 21 a khung a, assist vawi 5 a nei tling tawh.

Kum 30 mi chauh a la ni a, kum 4 emaw vel chhung chu tha taka a la khelh chhoh zel theih a rinawm a, trophy te a chawi chho ve turah ngai ila, sumdawnna kawngah pawh thawhpui tha tak tak a nei chho zel ang a, footballer sum la lut tam top 10-ah hi chuan a lang chho ve reng thei tura ngaih a ni.

9. Kevin de Bruyne :

Kum 32 mi Belgian midfielder hian kum khat chhungin 35 million dollars club atangin a hlawh a, field pawna sumdawnna lam atangin 4 million dollars a hlawhchhuak bawk a, field chhung leh pawn atangin 39 million dollars a hlawhchhuak a nih chu. Forbes-in footballer sum la lut hnem a tarlan zingah kum 2023 chhungin top 9-ah a lang phak.

Season liamta khan Manchester City chu a treble champion pui a, tun season erawh Premier League match hmasa berah a inhliam hlauh mai a, a la chawl char char a, January thla tir velah chuan a inkhelh leh theih rin a ni.

Hamstring hliamin tibuai mah se sumdawnna kawngah erawh a hlawk em em reng tho a, a thawhpui lian ber chu McDonalds niin, Belgium ramah lian takin an thawk dun mek reng. A tel lo hi chuan Manchester City pawhin an game hmuhnawm tak kha an khel hleithei bik lo, Erling Haaland pawh game lianah De Bruyne tel lo chuan a che ropui thei bik lo an tih thin kha a ni a, hlawh tam tak a hlawh hi a phu kan ti thei awm e.

8. Sadio Mane

Kum 31 mi Senegal international hian field chhungah kum khat chhungin 48 million dollars a hlawhchhuak a, field pawnah 4 million dollars a hlawh bawk a, field chhung leh pawn atangin kum khat chhungin 52 million dollars a hlawhchhuak a nih chu. Liverpool atangin Bayern Munich a pan a, mahse a tum angin a che thei lo, a team-mate Sane nen an intibuai bawk nen, Ronaldo khelhna Saudi Pro League club Al Nassr lam a pan ta a, hetah hian hlawh tam tak pek a ni ta a ni.

2018-19 season khan a team-mate Mohamed Salah nen Premier League Golden Boot lawmman an dawng dun a, ram tan pawh goal 30 chuang a khung tling tawh bawk. Mi thenkhat chuan Liverpool a chhuahsan kha a tifuh lem lo niin an sawi thin a, Bayern Munich-ah kha chuan a che fuh lo ve hle a, mahse tunah chuan hlawh tam tak a hlawh theihna club Al Nassr tan a khel tawh a, a hlawhtling thawkhat viau tho mai. Field pawn lamah chuan New Balance nen an thawk ho a, hetah tang hian sum tam tak an la lut bawk a ni.

7. Mohamed Salah :

Kum 31 mi Liverpool forward hian field chhungah kum khat chhungin 35 million dollars a hlawhchhuak a, field pawna sumdawnna atangin 18 million dollars a hlawhchhuak bawk a, field chhung leh pawn atangin 53 million dillars a hlawhchhuak tihna a nih chu.

Salah hi Saudi Pro League lam pawhin an hel ve reng bawk a, Al Ittihad chuan Saudi Pro League transfer fee man to ber 190 million dollars-in Salah hi an dawr, mahse Egypt international hian Liverpool tana khelh a la duh reng a.Hetih lai hian nakkum nipui bazar inhawn hunah erawh boruak a danglam ve thei dawn tlat mai.

Salah hian Saudi ProLeague lam a hnawl thu engmah a la sawi lo a, tha taka a khelh theih chhung chu Liverpool tana khelh zel a la thlang niin a lang.  Tun season Premier League game 16 a khelh tawh atangin goal 11 a khung tling tawh a, kum 31 mi ni tawh mah se tha takin a la khel thei mek zel a,Liverpool lam pawhin chhuahtir an la phal lo hle bawk. Mahse an upa tulh tulh a, an hlutna leh an theihna a nep tawlh tawlh a, Saudi Pro League transfer fee to ber nih hi pawi a la ti lo maithei bawk a ni.

Field pawn lamah chuan Adidas nen an thawk ho a, heta tang hian sum tam tak a la lut bawk a ni.

6. Erling Haaland

Manchester City striker kum 23 mi Erling Haaland hian club atangin kum khat chhungin 46 million dollars a hlawh a, field pawn lama sumdawnna lam atangin 12 million dollars a hlawhchhuak bawk a, field chhung leh pawn atangin 58 million dollars a hlawhchhuak tihna a nih chu.

Season liamta khan Haaland hian goal 52 lai a khung a, Premier League, FA Cup leh Champions League-ah te Manchester City a champion pui. Manchester City hian Norway international kum 23 mi hi chelh an tum ruh hle a, contract chungchang pawh sawipui an tum chho leh mek. Tun season Premier League-ah game 15 atangin goal 14 a khung tling tawh a, assist pawh vawi 4 a nei tawh bawk.

Field pawn lamah chuan Kine nen an thawk ho a, EA Sports  FC2024 cover atan hman a ni bawk a, EA chuan an product hralh kawngah Haaland hi an hma theh a, kum naupang tak a la nih avang hian a sum lak luh pawh hi a la pung chho zel dawn niin a lang.

Real Madrid chuan Haaland hi an la ngaihven reng nia report a ni a, Manchester City-ah hian kum 25 thleng pawh khel mah se, kum 25 hnuah hun rei tak chhung Real Madrid tan a la khelh theih dawn tho avangin Los Blancos lam chu Haaland lak tumna kawngah hian an la hmanhmah em em lo nia ngaih a ni.

5. Karim Benzema

Kum 35 mi Al Ittihad striker hian club atangin kum khat chhungin 100 million dollars a hlawh a, field pawna sumdawnna atangin 6 million dollars a hlawh bawk a, field chhung leh pawn atangin 106 million dollars a hlawhchhuak tihna a nih chu.

Ballon d'Or a dawn hnu lawkah Benzema hian Real Madrid-a a khelhpui thin Cristiano Ronaldo chu Saudi Pro League lamah a zui lut a, Real Madrid-ah contract la nei mah se, a kum lam a lo tam chhoh ve tak avangin Benzema hian league nem zawk leh hlawh tam tak a  hlawh theihna lam a pan ta a ni.

Real Madrid tan tha taka a la khelh theih rin a nih laia Saudi Arabia lam a pan thut kha mi tam tak chuan mak an ti hle a nih kha. Mahse Benzema chuan Muslim a nih angin Saudi lam pan hi a chak em em thin a nih thu a sawi chhuak a nih kha. 

4. Kylian Mbappe

Kum 24 mi French forward hian PSG-ah kum khat chhungin 90 million dollars a hlawhchhuak a, field pawn sumdawnna atangin 20 million dollars a hlawh bawk a, field chhung leh pawn atangin 110 million dollars a hlawhchhuak a nih chu.

Mbappe hian kum 2022 khan Real Madrid a pan tawh dawn emaw kan ti hman a, mahse PSG chuan sum tam tak nen Mbappe hi an chelh ta a, hei vang hian Europe-a la khel mek player zinga hlawh hnem ber a nih phah ta a ni.  A tet lai atanga khelh a chakna Real Madrid hi a pan dawn nge dawn lo sawi lawk a la harsa deuh.

Tun January transfer window inhawn hunah hian club dang te chuan Mbappe hi an dawr tan thei tawh dawn a, kum 24 mi hian PSG-ah contract ziah a tum tawh lo tih a sawi chiang a, chuti a nih chuan nakkum nipui bazar inhawn hunah free transfer-in a duhna hmun a pan thei dawn tihna a nih chu.

PSG chuan a thlawna chhuahtir ai chuan, tun January transfer window inhawn hunah chhuahtir mai an rilruk maithei a, Real Madrid chuan January ni 15 thleng Mbappe chu a rilru siam felna hun an pe niin AS chuan a tarlang. 

Man neia Real Madrid pan ai chuan, a thlawna Real Madrid pan chu Mbappe-a nu duhdan a ni leh dawn tho, a chhan chu hlawh tam tak a hlawh chhuah theihna tur a nih dawn vang a ni a, engpawh nise, Europe-ah chuan Mbappe aia hlawh sang player dang an awm thei rih dawn lo a ni.

3. Neymar

Kum 31 mi Brazil forward hian field chhungah kum khat chhungin 80 million dollars a hlawhchhuak a, field pawn atangin 32 million dollars lai a hlawhchhuak a, kum khat chhungin field chhung leh pawn atangin 112 million dollars a hlawhchhuak tihna a nih chu.

PSG-ah khan a la khel chhunzawm zel dawn emaw tih laiin fans lamin an ngaina tawh lo a, Neymar chuan Saudi ProLeague club Al Hilal sawmna mawm tak chu a pawm ta nge nge, a club tharah hian a hlawh hnem hle a, Ronaldo dawta Saudi Pro League player hlawh hnem ber a ni ta a ni.

Inhliam chungin PSG a chhuahsan a, October thla khan Al Hilal tana a goal hmasa ber a khung. Hetih lai hian ram tana a fehchhuahnaah a inhliam leh hlauh mai. Nakkum Copa America-ah Brazil tan a inlan theih beisei a ni ta chauh mai.

Field pawn lamah chuan Puma, Konami leh Red Bull te nen an thawk ho a, Protuguese horse breeding farm Team Campline nen pawh an thawk ho bawk. Player tha tak ni mah se a inhliam ngun malh malh hle a, Ballon d'Or dawng loin Europe a chhuahsan ta a ni.

2. Lionel Messi

Kum 36 mi Argentine captain Lionel Messi hian club atangin kum khat chhungin 65 million Dollars a hlawh a, field pawn lam sumdawnna atangin 70 million dollars lai a hlawh hem mai. Field chhung leh pawn atangin 135 million dollars a hlawhchhuak a, Forbes top 11 ah pahnihna a ni.

PSG tan league title a zawnin la mah se, a miten an ngaina si lo. World Cup title a lak hnuah Messi chu Barcelona lamah a kir leh dawn emaw tih a nih laiin Major League Soccer lam a pan ta daih mai. 

Inter Miami chu trophy a chawipui leh nghal pang a, a inkhel en tum mipui an pungkhawm hnem thei hle. Club atangin hlawh tam lem lo mah se Messi hian Apple TV lam atangin TV Rights thahnem tak a hui chho mek zel a, hei hian nasa takin a sum lak luh pawh a tihtam phah bawk a ni.

1. Cristiano Ronaldo

Kum 2023 chhunga sum la lut hnem ber chu tu dang ni lovin, Cristiano Ronaldo a ni leh ta. Kum 38 mi Ronaldo hian Al Nassr atangin kum khat chhungin 200 million dollars a dawng a, field pawn lam sumdawnna atangin 60 million dollars a dawng bawk a, field chhung leh pawn atanga a sum lak luh chu kum khat chhungin 260 million dollars a ni hem mai.

Ronaldo hi kum 2014 atang khan, kum 2014, 2015, 2016, 2017, 2021 leh 2023-ah te kum khat chhunga FOotballer sum la lut hnem ber a ni a, kum 2014 atang khan Ronaldo hi kum 6 lai kum khat chhunga sum la lut hnem ber niin, Messi chuan kum 3 chhung sum la lut hnem ber nihna a hauh a, Mbappe chu vawi khat sum la lut hnem ber a ni ve bawk.

Erik ten Hag nena an inkar a that loh avangin leh a interview RAW tak avangin Manchester United chuan nikum December thla khan Old Trafford-a a contract chu an tihtawp sak a. Ronaldo hian Saudi Pro League a pan chhunzawm a, Ronaldo-a'n Saudi a pan hnu chiah hian player tha tam takin Saudi lam an pan nguah nguah bawk.

Field pawn lama a sumdawnna pawh a liantham hle a, Clear, Herbalife leh Binance te nen thawk hoin, Instagram lam atang pawhin sum tam tak a la lut bawk a ni.

Thla khat chhung chuan 21 million dollars a hlawh tihna a ni a, ni khatah chuan dollar nuai 7 a hlawh dawn tihna a ni a, India pawisa chuan ni khat chhungin 599,74,506 (nuai 600) vel a hlawh dawn tihna a ni a, darkar khatah chuan nuai 50 vel a hlawh a, minute khatah cheng Sing 8 vel a hlawh a, second tin Cheng sangkhat zathum vel a hlawh dawn tihna a ni.