David de Gea chuan tun nipuiah Manchester United a chhuahsan tur thu a sawi chiang ta a, United-ah contract thar a ziak dawn lova, kum 12 zet a lo awm tawhna Old Trafford a chhuahsan dawn.
De Gea contract hi June thla a ral tual khan a tawp tawh a, United hian contract thar ziahpui tum mah se inremna an nei thei lo niin a lang. De Gea hi free agent a ni a, a club pan tur lam a la sawi theih rih loh a ni.
"Manchester United fan-te zawng zawng ka mangtha duh a, kum 12 chhung lai in hmangaihna ka dawn zawng zawngah khan ka lawma, ka ngai hlu takzet a ni. Sir Alex Ferguson-a'n he club-a min hruai luh atang khan thil tam tak kan lo hlawh chhuak ho tawh a, he kawr ka hak apiang hian ka inchhuang em em thin.
"Khawvela club ropui ber tana ka khel thei hi chawimawina sang tak angah ka ngai a, footballer vannei zual tlemte zinga mi ka ni ka ti ngam. Ka lo thlen atangin hun chhinchhiah tlak leh hlawhtlinna tam tak kan tawng za a, naupangte ka nihlai khan hetianga hlawhtlinna hi ka tawn ka ring pha ngai lo.
"Tunah chuan chona thar ka hmachhawn ve a hun tawh a, hmun tharah hmalam pan ka tum tawh dawn. Manchester hi ka thinlungah chuan a nung reng ang a, Manchester hi min chul mamtu a ni a, min thlahthlam ngai dawn bawk lo,"tiin De Gea chuan social media-ah a post.
De Gea hi vawi li lai United player of the year a thlan a lo ni tawh a, Premier League Golden Glove award pawh a vawi 2 nan season hnuhnung ber khan a dawng. Season khelh zawh takah khan clean sheet 17 a nei a ni.
"Fan-te leh a teammate-te'n player of the year a vawi li lai an thlan atangte hian a that zia a lang a, club history-ah chuan goalkeeper tha ber anga hriat reng a hlawh tawh dawn,"tiin United manager Erik Ten Hag chuan De Gea chungchang a sawi.
Kum 2011 khan kha tih hunlaia United manager Sir Alex chuan kum 32 mi hi Atletico Madrid atangin a lalut a, United hian a manah pound maktaduai 18.9 an seng. United-a a awm chhungin Dea Gea hian game 545 a khel a, clean sheet vawi 190 a nei a, United goalkeeper awm tawh zinga clean sheet nei hnem ber a ni.
Spanish shot stopper hian United tan trophy panga a chawi a, Premier League, FA Cup leh Europa League te vawi khat theuh chawiin, English League Cup vawi hnih a chawi bawk.
United hian De Gea thlaktu tur an zawng mek a, Inter Milan goalkeeper Andre Onana chu an lalut dawn niin a lang a, club hnih te inbiakna a kaltluang a, United leh Onana te hi mimal thilah an inrem tawh bawk a ni.
