Tun season a zo ang a, coach an inthlak kual nual dawn niin a lang mek.
Bayern Munich leh Thomas Tuchel te chu tun season zawh rualin an inthen dawn. Bayern Munich chuan manager thar an zawng nghal char char a, The Athletic-in a tarlan dan chuan, Bayern Munich hian Bayer Leverkusen manager Xabi Alonso lak an tum.
Tin, English media te chuan Klopp chu Bayern Munich manager thar tur niin an sawi ve mek bawk a. Liverpool boss Jurgen Klopp hian tun season zawh ruala Liverpool chhuahsan a tum thu a sawi chiang ve tawh bawk a nih kha.
Klopp hian kum khat emaw tal chawlh a tum dawn nia report a ni, hetih lai hian Bayern Munich lamin an sawm chuan Klopp hian chawlh a hman phal a rinawm loh bawk.
Tun season Bayer Leverkusen sang taka vawrhtu Xabi Alonso hi tunlai manager zingah chuan hot ber pawl a ni mek. Ani hi Liverpool pawhin an awt ngang mai, Klopp ngei pawhin, "Manager thar tha tak tak an rawn chhuak teuh tawh a, chung zinga tha ber pakhat chu Xabi hi a ni. Ani hi Liverpool enkawl tur chuan a tha tawk a ni," tiin a lo sawi tawh bawk.
Xabi Alonso hian Leverkusen-ah contract thar nikum khan ziak chauh mah se, sawmna lian tak a dawn chuan, Liverpool emaw Bayern Munich emaw a pan a rinawm hle niin football pundit te chuan an tarlang.
Dortmund, PSG leh Chelsea manager hlui Thomas Tuchel hi Manchester United nen sawi zawm a ni ve mek bawk a, United neitu zingah Sir Jim Ratcliffe a tel thar a, ani hian team thar din a tum ruh hle.
A season khatnaah Erik ten Hag chuan Manchester United sang takah vawrh mah se, tun season erawh Champions League an khel phak dawn nge dawn lo a hriat loh. February thla chhung chuan an kal tluang viau a, mahse team a khelhpui danah United hotute lung a awi lem lo niin media te chuan an tarlang.
Champions League an khelh phak loh chuan, United hian Erik ten Hag an chhuahtir ngei dawn niin media te chuan an tarlang. Chutah chuan Bayern Munich manager hna chhuahsan tur Thomas Tuchel hi an la dawn niin an tarlang mek bawk.
Xavi Hernandez pawhin Barcelona a chhuahsan dawn bawk a, Jose Mourinho te pawh coach hna nei lo an awm mek bawk nen. Tun nipui bazar chu player insawn an awm leh teuh ang a, manager transfer pawh an awm nual dawn bawk a ni.