India club hlun Mohun Bagan chuan I-League-a Aizawl FC champion puitu centre-back Kingsley Obumneme chu lak tumin hma a la mek a, reilote chhungin Bagan hian contract a ziahpui mai rin a ni.

Kolkata club lian Mohun Bagan hian he Nigerian defender hi Calcutta Football League (CFL) atan lakluh a tum niin feverpitch.in chuan a tarlang.

Aizawl FC an champion theih nana tha thawh hlawk tak Kingsley hi ball kangah a that mai bakah attacking neih nan player fing a ni bawk a. Rajiv Gandhi Stadium-a hneh loh tawng lova season an tluan theihna chhan pawh he defender hi a ni kan ti lo thei lo a ni.

Dinthar FC-ah pawh lo khel tawh Kingsley hi Kolkata-ah pawh a mikhual dawn hauh lo, Kalighat Milan Sangha, Police AC, United SC leh Peerless-ah te a lo khel kual tawh a, Bagan hian season pum atan lei an tum em tih chu hriat a la ni lo a ni.

Aizawl FC player pathum Amna, Chullova leh Brandon te chuan East Bengal an zawm a, manager Khalid Jamil pawh chhuak mai thei niin Kolkata lam media te chuan an tarlang a ni.