Real Madrid manager Carlo Ancelotti chuan, UEFA Super Cup an chawi hnuah, an striker Karim Benzema chu, tun dinhmuna khawvela player tha ber a nih thu a sawi.

Nilaini zanlai khan Super Cup inkhelah Real Madrid hian si hnih faiin Frankfurt an hneh a, he inkhelah hian Real goal hnihna hi kum 34 mi Benzema thun a ni.

French striker Benzema hian heti hian Real tan goal 324 a khung tling ta a, Raul lehpelin Real Madrid tana goal khung hnem ber dawttu niin, Real tana goal 450 khung thei Cristiano Ronaldo chiah a pha tawh lo a ni.

World Cup hmain football-a mimal lawmman hlu bera ngaih Ballon d’Or an sem dawn a, Benzema hi kumin Ballon d’Or dawng tura rinkai ber niin, a dawn ngei pawh a rinawm hle.

Frankfurt an hneh zawhah Ancelotti chuan, “Karim hi khawvela player tha ber a niin ka hria. Kan player pawimawh ber a ni a, khawvela player tangkai leh tha ber a ni bawk. Karim hi season hmasa Champions League-ah pawh khan final-ah goal khung lo mah se, a khelh dan avang hrim hrim hian kan player pawimawh ber a ni a, Manchester City, Chelsea leh Paris Saint-Germain laka a goal khung avanga final lut kan ni. Kan tan a pawimawh em em a, tun dinhmunah chuan khawvela player tha ber a ni chiang hle,” tiin a sawi.