Syrian veteran footballer Mahmoud Al Amna chuan NorthEast United-a an Head of Academy ni lai Khalid Jamil chu Indian Super League club enkawl thei khawpa tha a nih thu leh, a manager hrawn tawha a duh ber a nih thu a sawi.

Amna leh Jamil te hi season hnih an thawk dun tawha, Aizawl FC-a an awm laiin I-League ah an champion nghe nghe a nih kha.

2016-17 season-a Jamil-a’n mak tak maia I-League a Aizawl FC a champion pui tum khan Amna hi Aizawl FC player pawimawh bera chhal ngam a ni a, hemi season zawh hian East Bengal chuan Jamil hi lalutin, Amna hian East Bengal-ah Jamil hi a zui ve nghala, hetah hian Calcutta Football League (CFL)-ah champion leh nghalin, I-League ah palina an ni a,Super Cup khelh hmasak berah final an thleng bawk.

Kum 37 mi Al Amna chuan kum 43 mi Khalid Jamil-a chungchang sawiin, “Khalid Jamil nen season hnih chhung kan thawk dun a, Aizawl FC-a kan awm laiin I-League ah kan champion nghe nghe. East Bengal lamah Calcutta Football League-ah kan champion leha, Super Cup final kan lut bawk.

“Pa hawihhawm tak a ni a, mi tlang tak a niin, tactician tha em em a ni bawk. Player te a zah thiamin, dressing room min ti lungrual em em thin. Ka career chhungin coach tam tak ka hrawn tawha, coach tha tak tak te pawh hrawn nual tawh mah ila Khalid Jamil hi ka duh ber a ni,” tiin Goal a hrilh.

Sawi zelin Amna chuan, “Indian coach te hi ISL club enkawlna chance pek an ngai a, Khalid Jamil hian AFC Pro License neiin, I-League ah club enkawlin tawnhriat tam tak a nei tawh. Club lian tak tak East Bengal leh Mohun Bagan te pawh a enkawl tawha, tunah hian ISL lama head coach nih theihna chance pawh a nei sang tawh hle a, club-te hian Indian coach te hi hma an sawn zel theih nan chance an pek a ngai a ni,” a ti bawk.