Chelsea midfielder pawimawh N’Golo Kante chu hun rei tak a inhliam avanga a chawlh hnuah a dam leh tawha, Zirtawpni khan friendly match-ah Chelsea tan a inlan.

International break a nih avangin, Zirtawpni khan Chelsea chuan friendly match an khela, entu mipui awm lovin Charlton XI an hmachhawna, si thum faiin an chak. He inkhelah hian Chelsea academy player te an inlan tam ber a, Silko Thomas, Malik Mothersille leh Dion Rankine te chuan goal khat theuh an thun.

Kante hian Charlton XI lakah hian minute 60 a khela, harsatna nei lovin a khel a, international break zawhah Chelsea hian French defensive midfielder hi an chhawr ngam tawh a rinawm a ni.

Nikum August thla khan Kante hian hamstring injury a nei a, zai a nih zui bawk avangin a la inkhel leh lova, tunah an manager Graham Potter-a hnuaiah hian minute engzat mah a la khel lo.

International break hma chiah khan Chelsea leh Everton te chu 2-2 in an inhnehtawka, he inkhelah hian Potter chuan Kante hi bench-ah dah mah se, a luh tir ta lova, April thla ni 1-a Aston Villa an hmachhawn hunah Kante hian inkhel bul a tan loh pawhin bench atanga a luh a rinawm tawh a ni.

Chelsea hian game pawimawh tak tak khelh tur an nei chho dawna, Champions League quarter final-ah Real Madrid nen inhmachhawn dawnin, Real Madrid lakah Chelsea hian kum 31 mi Kante hi tha taka chhawr thei dawn niin a lang a ni.