Manchester United captain hlui, tuna Sky Sports pundit ni mek Roy Keane chuan Harry Kane-a’n trophy a chawi duh a nih chuan Tottenham a chhuahsan a ngaih thu a sawi.

Kane hi tunlai striker tha ber pawl a ni a, Premier League-ah chauh pawh ni lovin, khawvel pum ang pawh striker tha ber zinga mi a ni mek.

England captain Kane hi hetiang taka player tha ni mahse, vawiin thlengin trophy chawi a la nei lova, mimal chawimawina lawmman erawh a dawng hnem tawh viau thung.

Kane hi a naupan zual laiin Arsenal leh Watford academy-ah te pawh awm thin a ni a, kum 2004 khan Tottenham academy-ah lutin, kum 2009 khan Totteham senior team lamah a chho.

Tottenham senior team a zawm hnuah kum 27 mi hian loan-in Leyton Orient, Milwall, Norwich City leh Leicester City-te a zawm tawha, tunah hian Tottenham-ah kum thum daih contract a la nei mek.

Irish midfielder hlui Keane chuan Kane-a chungchang sawiin, “Player tha ber zinga mi nih chuan trophy chawi a duh ngei dawna, tunah hian Tottenham-a contract nei lai a ni a, hemi chungchangah hian Tottenham lamin sawi tur pawh an ngai viauin a rinawm.

“A dinhmunah hian awm ta ila, trophy a chawi duh a nih chuan tun nipui bazar inhawn hunah hian a chhuah ngei a ngaia, a chhan chu Tottenham-ah hian trophy lian a chawi ngai dawn lo a ni,” a ti.